Yol polisi radara düşdü, cərimə vətəndaşa göndərildi - Fotolar

Azərbaycanda Dövlət Yol Patrul Xidmətinin (YPX) avtomobili sürət həddini aşıb, lakin bununla bağlı cərimə protokolu başqa bir sürücüyə göndərilib.
Yeniavaz.com xəbər verir ki, bu barədə sözügedən sürücü F.Ağalarova sosial şəbəkələrdə məlumat yayıb. O bildirib ki, son vaxtlarda Bəhramtəpə yolundan istifadə etməsə də, ona cərimə yazılıb və DYP avtomobilinin qaydaları pozmasını əks etdirən fotolar həmin protokola əlavə edilib. Belə ki, Hacıqabul-Horadiz yolunun İmişli rayonundan keçən hissəsində sürət həddi 90 km/saat olan yolda 99-YP-978 dövlət nömrə nişanlı yol polisi avtomobili 129 km/saat sürətlə 06:54-də radara düşüb. Bununla bağlı cərimə protokolu 99 MP 978 dövlət nömrə nişanlı avtomobilə yazılıb:
“O saatda mən evdə yatırdım, ömrümdə də belə avtomobilim olmayıb. Sarı jilet isə əsla geyinməmişəm”.
Məsələ ilə bağlı Baş Dövlət Yol Polisi İdarəsinə sorğu ünvanladıq. Qurumun mətbuat katibi Rövşən Tağıyev Yeniavaz.com-a bildirdi ki, belə bir hal həqiqətən də yaşanıb və nöqsan artıq aradan qaldırılıb: “Həmin qayda pozuntularını elektron qaydada fəaliyyət göstərən qurğular müəyyən edirlər. Artıq sistemdə qeydə alınmış yanlışlıq aradan qaldırılıb və vətəndaşla bağlı elektron sistemdə təyin edilmiş cərimə cəzası müvafiq qaydada silinib”.