"Qaradağ rayonunun Lökbatan qəsəbəsində yaşayan Kərəməli Şəkərovun oğlu Orxanın həbsi ilə bağlı səsləndirdiyi iddialar istintaqın gedişinə təzyiq məqsədi daşıyır və tamamilə əsassızdır".
Bu sözləri məsələ ilə bağlı Yeniavaz.com-a açıqlamasında DİN-in Mətbuat Xidmətinin bölmə rəisi Zeyni Hüseynov deyib.
O bildirib ki, O. Şükürovla bağlı əməliyyat bir qrup vətəndaşın müraciəti əsasında başladılıb:
"Belə ki, bir qrup vətəndaş Daxili İşlər Nazirliyinə müraciət edərək tanımadıqları şəxs tərəfindən şantaj edilərək pul tələb etdiyini bildirməklə onun müəyyən edilərək məsuliyyətə cəlb edilməsini xahiş etmişlər.
Keçirilən əməliyyat-texniki tədbirlərlə həmin şəxsin Şəkərov Orxan Kərəməli oğlu olduğu müəyyən edilmişdir. Onun müxtəlif proqram təminatları, eləcə də sosial şəbəkələrə daxil olaraq qadın görüntüləri ilə həmin vətəndaşlarla görüntülü ünsiyyət yaratdıqdan sonra topladığı videoları yayacağı ilə hədələyib onlardan bank kartına pul köçürmələrini tələb etdiyi müəyyən edilmişdir.
Həyata keçirilmiş tədbirlərlə Orxan Şükürov bu il oktyabrın 8-də Qaradağ rayonu ərazisində saxlanılaraq DİN-in Baş Mütəşəkkil Cinayətkarlıqla Mübarizə İdarəsinə gətirilmiş və üzərinə keçirilən şəxsi axtarış zamanı ondan 2 bükümdə 7,164 qram psixotrop maddə olan metamfetamin aşkar olunaraq götürülmüşdür.
Faktla bağlı cinayət işi başlanılaraq Orxan Şəkərova Cinayət Məcəlləsinin 234.4.3-cü (satış məqsədilə qanunsuz olaraq külli miqdarda psixotrop maddə əldə etmə, saxlama və daşıma) və 182-ci (hədə-qorxu ilə tələb etmə) maddələri ilə ittiham elan edilməklə barəsində həbs qətimkan tədbiri seçilmişdir. İstintaq zamanı O.Şəkərov törətdiyi cinayət əməllərini etiraf etmiş, bədən səthində xəsarətlərinin, eləcə də narkotik vasitə və psixotrop maddələrdən asılılığının olub-olmamasını müəyyən edilməsi ilə bağlı müvafiq ekspertizalar təyin edilmişdir. Tibbi müayinə zamanı O.Şəkərovun bədənində hər hansı xəsarətin olmadığı, eləcə də psixotrop maddələrin qəbulu nəticəsində asılılıq sindromunun aşkar olunduğu, həmçinin ondan götürülmüş qan və sidik nümunələrinin tərkibində metamfetaminin olduğu müəyyən edilmişdir.
Hazırda cinayət işi üzrə istintaq davam etdirilir".
***14 dekabr, 17:04
“Oğlumla Kürdəxanıdakı təcridxanada görüşdüm. Dedi, ata, məni elə Lökbatandakı qamışlığa apardılar, başıma sidik ifraz elədilər, o qədər döydülər ki, dedim, gətirin, nəyə istəyirsiniz, qol çəkim, məndən əl çəkin”.
Yeniavaz.com xəbər verir ki, bunu Bakının Lökbatan qəsəbəsində yaşayan Kərəməli Şəkərov Meydan TV-yə deyib.
O bildirib ki, 25 yaşlı oğlu Orxan Şəkərov oktyabrın 7-də günorta saatlarında Qaradağ Rayon Polis İdarəsinin 11-ci polis bölməsinin əməkdaşları tərəfindən saxlanılıb. Atanın iddiasına görə, ərazi polisləri Orxanı saxladıqdan sonra “Bandotdel” kimi tanınan Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşlarına təhvil veriblər. Ailə məsələdən həmin İdarədən gələn zəngdən sonra xəbər tutub.
“Zəng vurub, məni idarəyə çağırdılar. Getdim, özünü Ceyhun Məmmədov kimi təqdim edən mülki geyimli əməkdaş qəbul elədi. Dedim, uşağı niyə bura gətirmisiz? Dedi, barəsində şikayət var. Dedim, bu uşaq səhər evdən çıxır, orda-burda günəmuzd fəhləlik edir, kiminlə nə işi var axı… Barmaqlarını qoşalaşdırıb beş işarəsi göstərdi, dedim, 65 yaşım səhər saat 6-da evdən çıxıram, axşama kimi daş karxanasında daş yükləyirəm. Mənim kimsəyə verəcək pulum yoxdur. Dedi, özün bilərsən, “oformit” eləyib, göndərirəm Kürdəxanıya”, - K.Şəkərov bildirib.
Atanın sözlərinə görə, növbəti gün xəbər tutub ki, Orxan Bakı İstintaq Təcridxanasına göndərilib. Orada görüş zamanı ona məlum olub ki, oğlu Cinayət Məcəlləsinin 234.3 (Narkotik vasitələrin və ya psixotrop maddələrin qanunsuz hazırlanmasında və emalında istifadə etmək məqsədi ilə prekursorları satma, hazırlama, əldə etmə, saxlama, göndərmə və ya daşıma) maddəsiylə cinayət məsuliyyətinə cəlb olunub. Oğlu ona şərləndiyini deyib:
“Dedi ki, ata, əvvəlcə mənə dələduzluq maddəsiylə cinayət işi açmaq istədilər, gördülər, heç bir sübut yoxdur, Lökbatandakı qamışlıq əraziyə aparıb işgəncə verdilər, şəxsiyyətimi alçaldan hərəkətlər etdilər, başıma sidik ifraz etdilər, məni o qədər döydülər ki, gördüm əllərində öləcəm, dedim, verin, nəyə istəyirsiz qol çəkim”.
Kərəməli Şəkərovun sözlərinə görə, oğlu ona deyib ki, bir qadınla münasibət qurub, həmin qadın onu şantaj edib:
“Qadın polislərin adamı imiş, oğlumdan başqa daha bir neçə nəfəri şantaj edirmiş. Dedi ki, ata, qadın məndən hamilə qaldığını, ondan ayrılsam, evimizə gəlib, bu barədə ailəmə xəbər verəcəyini deyirdi, mən də ayrılmağa qorxurdum. Mənə kart verirdi, gedib pul çıxarırdım, gətirib özünə verirdim. Nə pul olduğunu bilmirdim”.
Kərəməli Şəkərov deyib ki, oğlu Orxan günəmuzd fəhləlik edirmiş, iki azyaşlı övladı var.
DİN-in Mətbuat Xidmətinin KİV və ictimaiyyətlə əlaqələr şöbəsinin rəisi Elşad Hacıyev deyilənləri yalan və şəxsi mülahizə hesab edib:
“Deyilənlər əsassız olmaqla yanaşı, şəxsi mülahizələrdir, faktsızdır. Vətəndaşın hansı cinayətdə şübhəli bilinməsindən asılı olmayaraq, prosessual tələblərə uyğun olaraq onun hüquq və vəzifələri polis əməkdaşları tərəfindən tədbirlərin görülməsi zamanı diqqət mərkəzində saxlanılır. İctimai mövqeyindən asılı olmayaraq heç bir vətəndaş qeyri-insanı rəftara məruz qala bilməz”.
Xatırladaq ki, dekabrın 10-də Amerika Birləşmiş Ştatları Beynəlxalq Korrupsiyaya Qarşı Mübarizə Günü və Beynəlxalq İnsan Hüquqları Günü münasibətilə “Bandotdel”in əməkdaşı Kərim Əlimərdanova qarşı sanksiya tətbiq edib.