Deputat yol polislərindən razılıq edir: "İndiyədək məni saxlayıb incitməyiblər"

"Yollarda qanun pozmadığım üçün Yol Polisi əməkdaşları da məni saxlamır".

Yeniavaz.com xəbər verir ki, bu fikirləri "ölkə.az"a açıqlamasında Milli Məclisin deputatı Tahir Mirkişili bildirib. 

Deputat istirahət günləri avtomobil idarə etdiyini söyləyib:
"Özüm də avtomobil idarə edirəm. Ancaq indiyədək elə halla rastlaşmamışam ki, Yol Polisi əməkdaşları məni saxlayıb incitsinlər. Çünki yollarda qanunu pozmuram. Düşünürəm ki, qanun hər kəs üçün eyni olmalıdır. Daha mən deputatam deyə Yol Polisi mənə güzəşt etməli deyil. Bu baxımdan da Yol Polisi əməkdaşlarının qanunu pozmayan sürücüləri saxlayıb incitməsinə inanmıram. İndiyədək şəxsən mən belə vəziyyətlə üzləşməmişəm. Məni polis saxlayıb, ancaq sənədlərimi yoxlayandan sonra normal şəkildə icazə verib getmişəm".