Yeni açılacaq iki IP TV kanalı barədə AÇIQLAMA

Milli Televiziya və Radio Şurası (MTRŞ) Azərbaycanda yeni açılacaq iki IPTV kanalının fəaliyyətinə aydınlıq gətirib.

MTRŞ-nin Hüquq və beynəlxalq əlaqələr şöbəsinin müdiri Nemət Cavadov deyib ki, bunlar internet TV-lərdir:

“Yəni IPTV kabel şəbəkəsi yayımının bir növüdür. Sadəcə olaraq burada kabel vasitəsilə deyil, internet vasitəsilə müəyyən televiziya kanallarının abunəçiyə ötürülməsi nəzərdə tutulur. Bu fəaliyyət lisenziya tələb etdiyindən MTRŞ hər iki kanala lisenziya verib. Bunların efirə aidiyyəti yoxdur”.

Qeyd edək ki, mayın 16-da Milli Televiziya və Radio Şurasının (MTRŞ) növbəti iclası keçirilib.

İclasda “Farrux Teleradio” MMC-nin və “Shakh Telecom” MMC-nin IPTV yayımı üçün lisenziya verilməsi barədə müraciətlərinə baxılıb və onlara kabel şəbəkəsi yayımı (yayım üsulu - internet, IP TV) üçün müddətsiz lisenziya verilib. (Trend)