Azərbaycanlıların Türkiyədən aldığı mənzillərin sayı açıqlandı - Ölkələrin SİYAHISI

Bu ilin 5 ayı ərzində Azərbaycan vətəndaşları Türkiyədən 464 mənzil, may ayı ərzində isə 90 mənzil alıblar. 
Yeniavaz.com Türkiyə Statistika Xidmətindən açıqlanan məlumatlara istinadən bildirir ki, ötən ilin eyni dövrü ilə müqayisədə Türkiyədən ev alan azərbaycanlıların sayı artıb. Belə ki, 2018-cı ilin yanvar-may aylarında azərbaycanlılar Türkiyədən builkindən 132 mənzil az - 332 mənzil satın alıblar.
Bu ilin may ayında isə azərbaycanlılar Türkiyədən 90 mənzil satın alıblar və bu ötən ilin may ayındakı göstəricidən 15 mənzil çox olub.
Məlumat üçün bildirək ki, xarici ölkə vətəndaşları bu ilin ilk 5 ayı ərzində Türkiyədən ümumilikdə 17 min 452 mənzil satın alıblar. Bu isə ötən ilin eyni dövrü ilə müqayisədə 77% və ya 7 min 593 mənzil çox olub.
May ayında Türkiyədə ev alan əcnəbilər arasında İraq, İran, Rusiya, Əfqanıstan, Səudiyyə Ərəbistanı, Almaniya, Yəmən, Küveyt, İngiltərə, İordaniya, Fələstin, Misir, və Azərbaycan vətəndaşları üstünlük təşkil edib.
May ayında isə xarici ölkə vətəndaşlarının Türkiyədən aldıqları mənzillərin sayı bu cür olub:

ÖLKƏLƏR	May, 2018	May, 2019
İraq	407	594
İran	217	509
Rusiya	165	285
Əfqanıstan	131	183
S.Ərəbistanı	206	157
Almaniya	123	155
Yəmən	52	155
Küveyt	114	152
İngiltərə	112	149
İordaniya	65	144
Fələstin	44	104
Misir	38	99
Azərbaycan	75	90