Ötən gün sosial şəbəkələrdə yayımlanan əsgər Novruzov Rüfət Yunis oğlunun videomüraciəti Təhsil Nazirliyi tərəfindən araşdırılıb və məsələnin müsbət həlli ilə bağlı müvafiq tapşırıq verilib.
Yeniavaz.com xəbər verir ki, bu barədə Nazirliyin İctimaiyyətlə əlaqələr şöbəsinin müdiri Cəsarət Valehov feysbuk hesabında yazıb.
"Məlumat üçün bildiririk ki, 8 saylı Ərazi Maliyyə Hesablaşma Mərkəzinin Xocalı şəhəri üzrə təsərrüfat qrupunun agenti Rüfət Novruzov 10 sentyabr 2020-ci il tarixindən 6 ay müddətinə ödənişsiz məzuniyyət ilə bağlı 8 saylı ƏMHM-nin rəisinə müraciət edib. ƏMHM-nin rəisinin imzaladığı müvafiq əmr əsasında (skrinlər əlavə olunur) Rüfət Novruzova 10 sentyabr 2020-ci il tarixindən ailə vəziyyəti ilə bağlı 6 ay müddətinə ödənişsiz məzuniyyət verilib.
Rüfət Novruzov Azərbaycan Respublikasının ərazi bütövlüyü uğrunda gedən döyüşlərdə iştirak etmək üçün ordu sıralarına çağırılıb, lakin ödənişsiz məzuniyyətdə olması səbəbindən hərbi xidməti dövründə onun maaşı ödənilməyib. Rüfət Novruzovun Vətən müharibəsində göstərdiyi şücaət və qəhrəmanlıq Təhsil Nazirliyi tərəfindən yüksək qiymətləndirilir. Onun 3 aylıq maaşı məbləğində maliyyə yardımı Təhsil İşçiləri Həmkarlar Komitəsinin büdcəsindən artıq ödənilib" deyə C.Valehov qeyd edib.
Qeyd edək ki, ölkəmizin ərazi bütövlüyü uğrunda döyüşlərdə iştirak etmiş qəhrəman təhsil işçiləri Təhsil Nazirliyinin daimi diqqətindədir və bu istiqamətdə davamlı olaraq müvafiq addımlar atılır.
Vətən müharibəsi iştirakçısı Novruzov Rüfət Yunis oğlu prezident İlham Əliyevə müraciət edib.
Yeniavaz.com xəbər verir ki, bu barədə N.Rüfət özü sosial şəbəkədə video paylaşaraq məlumat verib. 2 övlad atası olan Y.Novruzov müraciətdə maaşının verilmədiyini qeyd edib:
"Mən Gəncə şəhər Təhsil İdarəsinin, 8 saylı Ərazi Maliyyə Hesablama Mərkəzinin əməkdaşıyam. 2 aydır ki, döyüşlərdə iştirak edirəm və məmur Fərait Qəhrəmanov maaşımı ödəmir. Əsassız səbəblər gətirir və əsgərin haqqına girir”.
Məsələ ilə bağlı Gəncə şəhər Təhsil İdarəsi ilə əlaqə saxlamağa çalışsaq da, zənglərimiz cavabsız qaldı.
Tətbiqimizi yükləyə bilərsiniz
