Deputat gəlirlərini və xərclərini açıqladı: "Mart-avqust aylarında 20 min manat almışam"

Milli Məclisin deputatı Erkin Qədirli bu ilin mart-avqust ayları üçün əldə etdiyi gəlirin məbləğini açıqlayıb.
Yeniavaz.com xəbər verir ki, E.Qədirli bildirib ki, maaş, bayram payları və məzuniyyət haqqı daxil olmaqla, 20 min manat alıb.
“Bu isə aylıq ortalama olaraq 3,3 min manatdır. Maaşdan başqa gəlirim yoxdur”, - deyə E.Qədirli əlavə edib.
Millət vəkili qeyd edib ki, gəlirinin dörd min manatını xeyriyyə işlərinə, 2 400 manatını anasının evinin təmirinə, 1 500 manatını avtomobilinin təmirinə, 1 000 manatını saytın qurulmasına xərcləyib.
Onun sözlərinə görə, yerdə qalanları isə digər xərclərə - kommunal, benzin, saytlarda abunə haqlarına, ərzağa – sərf olunub.
E.Qədirli söyləyib ki, hazırda maaş kartında 9 min 860 manat 59 qəpik var.
“Hesabat dövründə heç bir əmlak əldə etməmişəm. Doğum günümdə dostlar Çin istehsalı olan bir smartfon, bir kostyum, bir köynək və bir qalstuk bağışlayıblar”.