Naftalanda iki minik maşının toqquşması ağır faciə ilə nəticələnib.
Yeniavaz.com xəbər verir ki, hadisə zamanı 3 nəfər ölüb, 4 nəfər yaralanıb. Ağır qəza Naftalan-Qaşaltı yolunda qeydə alınıb. Toqquşma nəticəsində 1 qadın, 2 kişi hadisə yerində dünyasını dəyişib. 4 nəfər - Orxan Həsənəliyev, Camal Dadaşov, Dusiya Həsənəliyeva və Elçin Aslanov müxtəlif dərəcəli bədən xəsarətləri alaraq xəstəxanaya yerləşdirlib.
Faktla bağlı Goranboy Rayon Prokurorluğundan verilən məlumatda bildirilir ki, iyulun 13-də saat 22 radələrində Naftalan şəhərinin Qaşaltı kəndi ərazisində 1993-cü il təvəllüdlü Orxan Həsənəliyevin idarə etdiyi “Vaz 2107” markalı avtomobillə 1996-cı il təvəllüdlü Camal Dadaşovun idarə etdiyi “Vaz 2107” avtomobilin toqquşması nəticəsində 3 nəfərin ölümü, 4 nəfərin isə müxtəlif dərəcəli bədən xəsarətləri almasına səbəb olan yol-nəqliyyat hadisəsi baş verib.
Faktla bağlı Goranboy rayon prokurorluğunda Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.
Cinayət işi üzrə hadisə yerinə və meyitlərə baxış keçirilib, şahidlər dindirilib, zəruri ekspertizalar təyin olunmuş və digər təxirəsalınmaz istintaq hərəkətləri həyata keçirilib.
Hazırda iş üzrə zəruri istintaq tədbirləri davam etdirilir.
Esmira Hidayətova, Naftalan