AMEA Elm Tarixi İnstitutunun Tarixşünaslıq və Mənbəşünaslıq şöbəsinin müdiri, tarix üzrə fəlsəfə doktoru, dosent Ziyad Əmrahov Ramiz Mehdiyevə müraciət edib.
Yeniavaz.com xəbər verir ki, o, R. Mehdiyevdən ölkə rəhbərliyi tərəfindən koronavirusa qarşı təcili və təxirəsalınmaz tədbirlərin görülməsinə göstəriş verilməsi üçün məsələ qaldırmasını xahiş edib.
Sözügedən müraciəti təqdim edirik:
“Hörmətli akademik! Məlum olduğu kimi, 2019-cu ilin dekabr ayından etibarən dünya dövlətlərini silkələyən virus təhlükəsi artıq Respublika sərhədlərini keçərək ölkəmizə daxil olub. Bu təhlükənin qarşısını almaq üçün ölkə rəhbərliyi tərəfindən təcili və təxirəsalınmaz salınmaz tədbirlər həyata keçirilərək Azərbaycan Respublikasının Nazirlər Kabinetinin yanında Operativ Qərargah yaradılıb. Əhalinin sağlamlığının və təhlükəsizliyinin təmin edilməsi məqsədilə 29 fevral saat 16.00-dan etibarən İranla sərhədin məhdudlaşdırıcı rejim əsasında müvəqqəti bağlanması haqqında qərar qəbul olunub. İxtisaslaşdırılmış xəstəxanalar və laboratoriyalar xəstəliyin müayinəsi və müalicəsi üçün müvafiq avadanlıqlarla və dərman preparatları ilə təmin edilib və işlər davam etdirilir.
Hörmətli Ramiz müəllim! Nazirlər Kabinetinin 01 mart 2020-ci il tarixli digər Sərəncamına əsasən, Koronavirus infeksiyasının Azərbaycan ərazisində yarada biləcəyi təhlükənin qarşısının alınması məqsədilə ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin davam etdirilməsi məqsədilə dərslər 2020-ci ilin mart ayının 27-dək dayandırılmış və bununla bağlı bütün tədbirlər təxirə salınmışdır.
Hörmətli Ramiz müəllim! Nazirlər Kabinetinin Operativ Qərargahı 10 mart 2020-ci ildə Ümumdünya Səhiyyə Təşkilatının son günlərdə koronavirus xəstəliyinə yoluxma hallarının artmasını, virusun coğrafiyasının genişlənməsini haqqında məlumatlarını nəzərə alaraq dövlətlər tərəfindən müvafiq preventiv tədbirlərin gücləndirilməsi, eləcə də kütləvi tədbirlərin təxirə salınması təşəbbüsü ilə çıxış edib.
Hörmətli Ramiz müəllim, yuxarıda sadaladığım məlumatlardan çıxış edərək Azərbaycan elminin əsas mərkəzlərindən biri olan Azərbaycan Milli Elmlər Akademiyasında çalışan bir vətəndaş, Azərbaycan ziyalısı olaraq qeyd etmək istəyirəm ki, yaranmış təhlükə Azərbaycanın ziyalı təbəqəsinin birgə çalışdığı Azərbaycan Milli Elmlər Akademiyası və onun əməkdaşları üçün də qaçılmazdır. İnsanların, ziyalıların birgə çalışdığı bu elmi müəssisənin, onun əməkdaşlarının yaranmış təhlükədən uzaq tutulması, qabaqlayıcı və preventiv tədbirlərin görülməsi, işçilərin sağlamlığı və Azərbaycanın elminin də bu virus təhlükəsindən maksimum az ziyanla çıxması üçün tərəfinizdən və ölkə rəhbərliyi tərəfindən təcili və təxirəsalınmaz tədbirlərin görülməsinə göstəriş verilməsi üçün məsələ qaldırmanızı sizdən xahiş edirəm!”.
Tətbiqimizi yükləyə bilərsiniz
