İrandan Azərbaycana gələn vətəndaşların koronavirusa yoluxması şübhəsi ilə Astara rayon mərkəzi xəstəxanasında müayinəsi zamanı bir sıra narazıçılıqlar ortaya çıxıb.
Yeniavaz.com xəbər verir ki, bununla bağlı sosial şəbəkələrdə video yayımlanıb.
Görüntülərdə vətəndaşlar bildirir ki, Astara və Biləsuvar gömrük-sərhəd keçid məntəqələrindən müayinə üçün Cəlilabad Rayon Mərkəzi Xəstəxanasına aparılacaqlarını desələr də, onlar altı saatdan çox xəstəxanada saxlanılıblar. Bundan başqa xəstəxananın şəraitsizliyi, gigiyena qaydalarına əməl olunmaması, vanna otaqlarında suyun olmaması və vətəndaşlar üçün heç bir tədbirin görülməməsi də görüntülərdə öz əksini tapıb. Vətəndaşlar bu saat ərzində onlara su verilmədiyini də bildiriblər.
“Tibbi Ərazi Bölmələrinin İdarəetmə Birliyi”ndən (TƏBİB) Yeniavaz.com-a bildirildi ki, hadisə ilə bağlı hal-hazırda araşdırılma aparılır və araşdırma bitdikdən sonra məlumat veriləcək.
Qeyd edək ki, ötən gün Astara Rayon Mərkəzi Xəstəxanasının baş həkimi Əlövsət Əliyev işində yol verdiyi nöqsanlara baş həkim vəzifəsindən kənarlaşdırılıb.
Məsələ ilə bağlı video görüntülərdə danışan və Astara Rayon Mərkəzi Xəstəxanasında işləyən həkim Oktay Əmənullayevlə əlaqə saxladıq. O, Yeniavaz.com-a açıqlamasında məsələ ilə bağlı “Tibbi Ərazi Bölmələrinin İdarəetmə Birliyi”nin (TƏBİB) məlumat verəcəyini bildirdi. Xəstəxananın iki gün öncə işində yol verdiyi nöqsanlara baş həkim vəzifəsindən kənarlaşdırılığı deyilən Əlövsət Əliyev isə Yeniavaz.com-a açıqlamasında onun çalışdığı dövrdə şəraitin yaxşı olduğunu və heç bir problemin olmadığını bildirdi. Həkim eyni zamanda heç kimin onu işdən çıxarmadığını və öz ərizəsi ilə işdən çıxdığını qeyd etdi.
Tətbiqimizi yükləyə bilərsiniz
