Sabunçu rayonu Maştağa qəsəbəsində evlərə təbii qazın verilməsi dayandırılıb.

Yeniavaz.com xəbər verir ki, bu barədə oxu.az-a ərazidə yaşayan sakinlər məlumat verib.

Onlar qaz təchizatının dayandırılmasının səbəbləri barədə məlumatsız olduqlarını bildiriblər.

Məsələ ilə bağlı “Azəriqaz” İstehsalat Birliyinin (İB) mətbuat xidmətinin rəhbəri Ceyhun Səfər sözügedən ərazidə evlərə qaz təchizatının dayandırıldığını təsdiqləyib.

Onun sözlərinə görə, bu ərazidə təbii qazın verilməsinin dayandırılmasına səbəb qaz kəmərlərinə qanunsuz qoşulmaların aşkar edilməsidir:

“Belə hallarla daha çox Sabunçu rayonunun Maştağa və Kürdəxanı qəsəbələri, Nardaran kəndində, Binəqədi rayonunun Xocahəsən qəsəbəsi, Abşeron rayonunun Hökməli qəsəbəsi, Suraxanı rayonu Zığ kəndində və Xəzər rayonu Binə qəsəbəsində rastlaşmışıq. “Azəriqaz” İB qaz kəmərlərinə qanunsuz qoşulmaların qarşısını almaq üçün kəmərləri saxlayan dirəklərdən deşik açmaq məcburiyyətində qalıb.

Çünki əksər hallarda qanunsuz qoşulma aparanlar rezin borunu torpağın altından çəkir, dirəyin içərisi ilə yeridir və qaz xəttinin dirəyə oturduğu yerdən calaq etməklə qoşma aparır. Qoşma da özbaşına qaynaqsız edildiyi üçün qazın çox hissəsi rezin borunun qoşulduğu yerin kənarlarından havaya uçur. “Azəriqaz” İB-nin qazdan qanunsuz istifadə edənlərin həyətlərinə daxil olmaq, mənzillərinə baxmaq səlahiyyəti yoxdur. Bəzi vətəndaşlar həyətindən qonşularına qaz paylayır, istixanalarını qazla təmin edir, bir sözlə, özü üçün mini “qaz paylayıcı şəbəkə” yaradır”.

C.Səfərli onu da əlavə edib ki, ötən il ərzində qaz kəmərlərinə 42 mindən çox qanunsuz qoşulma aşkarlanıb:

“Ötən ilin 12 ayı ərzində qeyri-qanuni qoşulma hallarına görə, ölkə üzrə 42 839 (42 520 əhali qrupu, 319 qeyri-əhali qrupu) “Təbii qazdan istifadə qaydalarının pozulması haqqında” akt tərtib olunub.

67 531 071 m3 (bura qeyri-əhali qrupuna aid 5 902 291 m3 də daxildir) qaz itkisi hesablanıb. Qaz təsərrüfatına 6 753 107 manat (o cümlədən qeyri-əhali üzrə 1 180 458 manat) məbləğində ziyan dəyib. Bu ziyanın böyük əksəriyyəti Bakı şəhəri və paytaxt ətrafı ərazilərə aiddir. Çünki regionlarda əhali və qeyri-əhali üzrə cəmi 2199 akt tərtib olunub.

Azərbaycan Respublikasının Nazirlər Kabinetinin 2011-ci il 12 may tarixli 80 nömrəli qərarı ilə təsdiq edilmiş “Qazdan istifadə Qaydaları”nın 6.5-ci bəndində qeyd edilir ki, qazpaylayıcı şəbəkəyə qanunsuz qoşulma halları aşkar edildikdə, qazpaylayıcı qanunsuz xətti dərhal şəbəkədən ayırmaqla qazın verilməsini dayandırmalı və dəymiş zərərin ödənilməsini qanunvericiliyə uyğun olaraq, həmin şəxsdən tələb etməlidir. Lakin bu Qaydalarda itirilmiş qazın bərpası üçün borcun hesablanmasına aid hər hansı düstur yoxdur. Elə buna görə də mövcud qanunvericiliyin üzərində təkmilləşdirilmə işləri aparılır”.