Xəbər verdiyimiz kimi, gələn ilin dövlət büdcəsi layihəsində səhiyyə xərcləri üçün 1 milyard 369 milyon manat vəsaitin ayrılması nəzərdə tutulur.
Yeniavaz.com-un apardığı hesablama göstərir ki, 2020-ci ildə Azərbaycanın dövlət büdcəsində adambaşına düşən səhiyyə xərcləri 136 manat təşkil edir. Belə ki, Dövlət Statistika Komitəsinin bu ilin ilk yarısına olan məlumata görə Azərbaycan əhalisinin sayı 10 milyon 19,6 min nəfər olub. Mövcud məzənnə ilə (1$/1,7 AZN) hesabladığımız zaman adambaşına düşən səhiyyə xərcləri Azərbaycanda 80 dollara bərabər olur.
Müqayisə üçün qeyd edək ki, gələn ilin dövlət büdcəsi layihələrində adambaşına düşən səhiyyə xərcləri Gürcüstanda Azərbaycandan çox, Ermənistanda isə bir qədər az olacaq.
Məlumat üçün bildirək ki, Gürcüstanın gələn il üçün açıqlanan dövlət büdcəsi layihəsində səhiyyə üçün nəzərdə tutulan xərclər 1 milyard 118,5 milyon lari təşkil edəcək. Gürcüstan Dövlət Statistika İdarəsinin açıqladığı sonuncu məlumatda ölkə əhalisinin sayının 3 milyon 723,5 min nəfər göstərildiyini nəzərə alsaq, o zaman bu ölkədə adambaşına düşən səhiyyə xərcləri 300 lari təşkil edir. Mövcud məzənnə ilə (1$/2,96 GEL) hesabladığımız zaman isə bu rəqəm 101 dollara bərabər olacaq.
Ermənistanın dövlət büdcəsi layihəsində səhiyyə xərcləri üçün 109 milyard dram vəsaitin ayrılması nəzərdə tutulub. Bu ölkənin Statistika Xidmətinin açıqladığı sonuncu məlumatda isə ölkə əhalisinin sayı 2 milyon 963,4 min nəfər olduğu qeyd olunub. Belə olan halda Ermənistanda adambaşına düşən səhiyyə xərcləri 36,8 min dram təşkil edir. Mövcud məzənnə ilə (1$/475 AMD) hesabladığımız zaman bu rəqəm 78 dollara bərabər olacaq.
Ölkələr |
2020-ci ilin dövlət büdcəsində səhiyyə xərcləri |
Əhalinin sayı (nəfər) |
Adambaşına düşən səhiyyə xərcləri |
Gürcüstan | 378 milyon dollar 1 milyard 118,5 milyon lari |
3 milyon 723,5 min | 101 dollar 300 lari |
Ermənistan | 229 milyon dollar 109 milyard 14,6 milyon dram |
2 milyon 963,4 min | 78 dollar 36 800 dram |
Azərbayacan | 805 milyon dollar 1 milyard 369 milyon manat |
10 milyon 19,6 min | 80 dollar 136 manat |
İlkin Uğur