Bəzi xəstəliklərin müalicəsi olduqca çətindir, məsələn, onkoloji xəstəliklər kimi. Bu xəstəliyin adı belə insanları qorxuya salır. Xərçəng çox zaman insanın ölümünə də səbəb olur. Onkoloji xəstəliklərin erkən mərhələdə aşkar edilməsi, müalicənin uğurlu olması baxımından da əhəmiyyətlidir. Hazırda xərçəngə qarşı önləyici tədbir kimi skrininq proqramlar hazırlanıb.
Maraqlıdır, onkoloji skrininq nədir? Müayinəsi necə aparılır?
Yeniavaz.com xəbər verir ki, bu haqda lent.az-a danışan onkoloq Aysel İbrahimov bildirib ki, onkoloji skrininq sözügedən xəstəlik yaranmağa başladıqda, onun erkən aşkarlanmasıdır.
“Hər onkoloji xəstəliyin öz skrininqi mövcuddur. Məsələn, baş-boyun onkologiyası, döş onkologiyası, kiçik çanaq üzvlərinin onkologiyası və s. hər xəstəliyin özünə aid konkret skrinqi olunur. Amma hazırda onkoloji skrinqin tətbiq olunan növü tomoqrafiya (MRT) və ultrasəs müayinələrdir. Lakin vurğuladığım kimi, hər onkoloji xəstəliyin özünə uyğun onkoloji skrinqİ aparılır".
Mövzu ilə bağlı Kliniki Tibbi Mərkəzin cərrahı Rövşən İbrahimov da açıqlama verib.
O, bildirib ki, onkoloji skrininq – xüsusi instrumental laborator müayinələrə əsasən, heç bir onkoloji xəstəlik əlaməti daşımayan insanlarda bədxassəli törəmələrin aşkar olunmasıdır: “Orqanizmdə latent formada mövcud olan onkoloji xəstəliklər özünü büruzə verməyə bilər və belə hallarda problemdən tez xəbər tutmaq üçün onkoloji skrinninq vacib prosedurdur”.
Həkim əlavə edib ki, bu cür xəstəliklərin risk qrupuna zərərli vərdişləri (içki, siqaret) olan, artıq çəkili, yaşı 50-dən çox, ailəsində onkoloji xəstələr olan, səbəbsiz arıqlayan və iştahasızlıq əmələ gələn insanlar, hepatit B, C virusu, insan papilloma virusu olanlar, immun çatışmazlığı olanlar, əlverişsiz şəraitdə işləyənlər, əsəbi olanlar, yuxusuzluq, stress və digər əlamətlərdən əziyyət çəkənlər daxildir.
Tətbiqimizi yükləyə bilərsiniz
