Səfər Mehdiyev: "Azərbaycan gömrüyü Avropa regionuna sədrlik etmək hüququ əldə edib"


Bu gün Dövlət Gömrük Komitəsində fəaliyyət göstərəcək növbəti "Könüllü gömrükçü" dəstəsinin üzvləri ilə görüş keçirilib. 

Yeniavaz.com komitəyə istinadən xəbər verir ki, görüşdə Dövlət Gömrük Komitəsinin sədri, gömrük xidməti general-leytenantı Səfər Mehdiyev, Komitənin aidiyyəti strukturlarının nümayəndələri və "Könüllü gömrükçü" dəstəsinin 118 üzvü iştirak edib.

Könüllü gömrükçülər qarşısında çıxış edən Dövlət Gömrük Komitəsinin sədri Səfər Mehdiyev əsası ümummilli lider Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən müstəqil Azərbaycanın inkişaf strategiyasının mərkəzində gənclər siyasətinin dayandığını bildirib. Komitə sədri diqqətə çatdırıb ki, daim gənclərə yüksək diqqət və qayğı göstərən Prezident İlham Əliyev onların potensialının üzə çıxarılması, bilik və bacarıqlarının artırılması, həyatın bütün sahələrində irəli çəkilməsinə, yüksək etimad göstərilməsinə xüsusi önəm verib.

Səfər Mehdiyev ölkəmizdə həyata keçirilən gənclər siyasətinin və könüllü hərəkatının formalaşması, daha da inkişaf etməsində Birinci vitse-prezident Mehriban Əliyevanın reallaşdırdığı və müxtəlif sahələri əhatə edən layihələrin mühüm rol oynadığını diqqətə çatdırıb.

O da vurğulanıb ki, sıralarında minlərlə gənci birləşdirən könüllülərin ölkəmizdə keçirilən beynəlxalq əhəmiyyətli konfranslarda, mədəni-kütləvi tədbirlərdə, idman yarışlarındakı səmərəli və uğurlu fəaliyyəti onlara göstərilən yüksək dəstək, qayğı və etimadın nəticəsi kimi qiymətləndirilməlidir.

Daha sonra gömrük sistemində Prezident İlham Əliyev tərəfindən həyata keçirilən islahatlar, bu islahatların mahiyyəti, hədəfləri və uğurlu nəticələri barədə qısa məlumat verən Komitə sədri bildirib ki, gömrük orqanları şəffaflığın təmin olunması, kölgə iqtisadiyyatının aradan qaldırılması, ölkəmizin ixrac və tranzit potensialının artırılmasında mühüm addımlar atıb. Eyni zamanda, gömrük işinin təşkilində tətbiq edilən yeniliklər və həyata keçirilən islahatların nəticəsi olaraq beynəlxalq aləmdə böyük nüfuz qazanan Azərbaycan gömrüyü dünyanın ən inkişaf etmiş ölkələrinin təmsil olunduğu Avropa regionuna sədrlik etmək hüququ əldə edib. Komitə sədri bildirib ki, əldə edilən uğurlarda gömrük sistemində çalışanların əksəriyyətini təşkil edən gənclərin rolu danılmazdır.

Səfər Mehdiyev artıq könüllü gömrükçü dəstəsinin ilk üzvlərinin fəaliyyətini uğurla başa vuraraq sertifikatlarla təmin olunduğunu, yeni üzvlərin də bilik və bacarıqlarının artırılması, potensialının üzə çıxarılması istiqamətində bütün zəruri addımların atılacağını, lazımi dəstəyin göstəriləcəyini bildirib və onlara uğurlar arzulayıb.

Könüllü gömrükçülər adından çıxış edən Fərid Rəsulzadə gömrük orqanlarında 4 aylıq fəaliyyəti zamanı əldə etdiyi bilik və bacarıqların gələcək həyatı ilə yanaşı, karyerasının qurulmasında da mühüm rol oynayacağını vurğulayıb və könüllü gömrükçülər adından yaradılan şəraitə, göstərilən dəstəyə görə Prezident İlham Əliyevə və Birinci vitse-prezident Mehriban Əliyevaya təşəkkürünü bildirib.

Bildirişlərdən çıxın

Bildirişlərdən çıxın

DİGƏR XƏBƏRLƏR

Top