Bu rayonda məktəbləri qızdırmaq üçün 36 min manatlıq odun alınacaq


Azərbaycan Respublikası Təhsil Nazirliyi 1 saylı Ərazi Maliyyə Hesablaşma Mərkəzinin 30 avqust tarixində elan olunan kotirovka sorğusunun qalibi məlum olub.
Yeniavaz.com xəbər verir ki, kotirovka sorğusunun qalibi Kamilov Sadiq Faxrət oğlu (VÖEN - 7400089142) olub. Bu şəxs 1 saylı Ərazi Maliyyə Hesablaşma Mərkəzinə tabe olan ümumtəhsil məktəblərini 36 min 342 manatlıq doğranmış odunla təmin edəcək.
Məlumat üçün bildirək ki, 1 saylı Ərazi Maliyyə Hesablaşma Mərkəzinə tabe olan ümumtəhsil məktəbləri Sumqayıt şəhəri, Abşeron və Xızı rayonlarının ərazisində yerləşir. Eyni zamanda bu ərazidə yerləşən Qubadlı, Zəngilan və Şuşa rayon məktəbləri də 1 saylı Ərazi Maliyyə Hesablaşma Mərkəzinə tabedirlər.
Onu da bildirək ki, "Azəriqaz" İstehsalat Birliyinin bu ilin avqust ayında açıqladığı məlumatda ölkədə qazlaşdırma səviyyəsi ümumilikdə 96%-ə, Sumqayıt və Abşeronda 100%-ə çatdığı qeyd olunub.
Belə görünür ki, 1 saylı Ərazi Maliyyə Hesablaşma Mərkəzi odunu Xızı rayonu ərazisində yerləşən ümumtəhsil məktəbləri üçün alır.
Ümumtəhsil məktəblərinin qazlaşdırılması məqsədilə milyonlarla vəsait (təkcə bu il 8,7 milyon manat) ayrılmasına baxmayaraq paytaxt Bakıdan cəmi 70 kilometr məsafədə yerləşən məktəblər bu il də odunla qızdırılacaq.
 
İlkin Uğur
Bildirişlərdən çıxın

Bildirişlərdən çıxın

DİGƏR XƏBƏRLƏR

Top