Ötən həftə Bakıda keçirilən MDB dövlətlərinin əmək, məşğulluq və əhalinin sosial müdafiəsi üzrə Məşvərət Şurasının iclasında çıxışı zamanı Əmək və Əhalinin Sosial Müdafiəsi naziri Sahil Babayev bildirib ki, qeyri-rəsmi məşğulluğun qarşısının alınmasına yönələn tədbirlər çərçivəsində bu ilin oktyabr ayının 1-nə özəl sektorda əmək müqavilələrinin sayı ötən ilin müvafiq dövrü ilə müqayisədə 90 min 962 müqavilə və ya 16,5% artıb.
Yeniavaz.com xəbər verir ki, müzdla çalışan işçilərlə bəzən birdən çox əmək müqaviləsi bağlanıla bilir. Bu zaman bağlanan əmək müqavilələrinin sayı muzdla çalışan işçilərin sayından çox olacaq. Lakin, Əmək və Əhalinin Sosial Müdafiəsi naziri Sahil Babayev özəl sektorda bağlanan əmək müqavilələrinin neçə nəfər işçini əhatə etdiyini açıqlamasa da, bağlanan əmək müqavilələrinin qeyri-rəsmi məşğulluğun qarşısının alınmasına yönələn tədbirlər çərçivəsində, yəni əmək müqaviləsi olmayan şəxslərlə bağlandığını bəyan edib. Bu həm də o deməkdir ki, bağlanan hər bir müqavilə həm də muzdla çalışan işçilərin sayının artması demək olacaq.
Dövlət Statistika Komitəsindən açıqlanan məlumatlra istinadən bildirir ki, ötən ilin oktyabr ayının 1-də ölkədə muzdla işləyənlərin (əmək müqaviləsilə) sayı 1 milyon 552,7 min nəfər olub. Onlardan 883,2 min nəfəri iqtisadiyyatın dövlət sektorunda, 669,5 min nəfəri isə qeyri-dövlət (özəl) sektorunda işləyib.
Məlumat üçün qeyd edək ki, Statistika Komitəsinin muzdla işləyənlərin sayı ilə bağlı sonuncu məlumatı bu ilin avqustun 1-i tarixi üçün açıqlayıb. Həmin məlumatda qeyd olunur ki, avqustun 1-i tarixində qeyri-dövlət sektorda muzdla işləyənlərin sayı 711,4 min nəfər olub.
Bu həm də o deməkdir ki, otən ilin oktyabr ayının 1-dən ötən 10 ay ərzində ölkədə muzdla işləyənlərin sayı 41,9 min nəfər və ya 6,2% artıb.
Rəqəmlərdən də göründüyü kimi, Əmək və Əhalinin Sosial Müdafiəsi nazirinin son 12 ay üçün açıqladığı rəqəmlə (90,96 min), Statistika Komitəsinin 10 ay üçün açıqladığı rəqəm arasında (41,9 min) 2 dəfədən çox fərq var.
Əmək və Əhalinin Sosial Müdafiəsi nazirinin və Statistika Komitəsinin açıqladığı rəqəmlərin üst-üstə düşməsi üçün bu ilin oktyabr ayında əvvəlki 10 ay ərzində bağlanılan əmək müqaviləsindən çox müqavilənin bağlanması lazımdır.
Əvvəlki aylar üzrə orta statistik göstəricilərə baxdığımız zaman belə bir kəskin artımın olması praktiki olaraq mümkün deyil.
Məlumat üçün onu da bildirək ki, bənzər açıqlamanı bu ilin aprel ayında Əmək və Əhalinin Sosial Müdafiəsi Nazirliyinin şöbə müdiri Elnur Süleymanov da verib. Şöbə müdiri bildirib ki, bu ilin ilk 3 ayı ərzində əmək müqaviləsi ilə işləyənlərin sayı 65 min 821 nəfər artıb.
Halbuki Dövlət Statistika Komitəsinin eyni dövr - bu ilin ilk 3 ayı üçün açıqladığı məlumatda göstərilir ki, qeyri-dövlət sektorunda muzdla çalışan işçilərin sayı 19,6 min nəfər artıb.
Yuxarıda qeyd olunan rəqəmlərdən açıq şəkildə görünür ki, Əmək və Əhalinin Sosial Müdafiəsi naziri Sahil Babayevin, həmçinin şöbə müdiri Elnur Süleymanovun açıqladığı rəqəmlə Dövlət Statistika Komitəsinin açıqladığı göstəricilər arasında uyğunsuzluq var.
Tətbiqimizi yükləyə bilərsiniz
