Bakıda keçmiş ər-arvad vəhşicəsinə qətlə yetirildi - TƏFƏRRÜAT

Fevralın 5-də Bakının Binəqədi rayonunda iki gənc xüsusi amansızlıqla qətlə yetirilib. Yeniavaz.com xəbər verir ki, bu barədə Sputnik Azərbaycan-a Binəqədi Rayon Polis İdarəsindən məlumat verilib.

Belə ki, fevralın 5-də saat 11:30-da "28 May" qəsəbəsi ərazisində, orada yaşayan 27 yaşlı Məmmədov İlkin Elman oğlu və 25 yaşlı Muradzadə Sevinc Yaşar qızının cəsədləri tapılıb. İlkin məlumata görə, oğlan bıçaq zərbəsi ilə, qız isə boğularaq qətlə yetirilib. 

Bir müddət sonra Nərimanov Rayon Polis İdarəsinin 18-ci polis bölməsinin əməkdaşları bu iki nəfəri qətlə yetirməkdə şübhəli bilinən şəxsi saxlayıblar. Məlum olub ki, o, Sevinc Muradzadənin yaxın qohumu, Beyləqan rayonunun 30 yaşlı sakini Behbudov Vəli Əli oğludur.

Saxlanılan şəxslə bağlı AR Cinayət Məcəlləsinin "Qəsdən adamöldürmə" maddəsi ilə cinayət işi açılıb. İlkin araşdırma zamanı məlum olub ki, Məmmədovla Muradzadə əvvəllər evli olublar və sonra rəsmən boşanıblar. Bir il əvvəl bu evlilikdən uşaq dünyaya gəlib. Lakin cavanlar yola getmədiklərindən, ayrılmaq qərarına gəliblər.

İstintaqın versiyasına görə, Behbudov hakim missiyasını öz üzərinə götürərək ayrılmış cavanları barışdırmağa çalışıb. O, bu humanist missiya ilə qohumu Muradzadəni götürərək Məmmədovun "28 May" qəsəbəsindəki evinə gətirib. Lakin orada heç də hər şey Behbudovun planlaşdırdığı kimi olmayıb.

Sabiq ər-arvad burada söyüşə keçiblər və bir-birini ağır sözlərlə təhqir ediblər. Bu söyüş və təhqirlərin bir ucu da elə Behbudova gedib çıxıb. Bu zaman əsəbləşərək özündən çıxan Behbudov əvvəlcə Məmmədovu bıçaqla vurub, sonra isə qohumunu boğub. Cinayəti törətdikdən sonra o, polisə gələrək günahını etiraf edib. 

Hazırda faktla bağlı istintaq davam edir.