"AzTV və İTV-nin birləşdiriləcəyi ilə bağlı fikirlər səslənir. Son dövrlərdə Prezident tərəfindən dövlət sektorunda optimallaşdırma və idarəetmənin təkmilləşdirilməsi, büdcə xərclərinə qənaət istiqamətində atılan addımlar baxımından bu məsələ daha da aktuallaşıb".
Yeniavaz.com xəbər verir ki, bu fikirləri sosial şəbəkədəki səhifəsində ekspert Osman Gündür bildirib.
Qanunvericiliklə İTV qarşısına qoyulan vəzifələrin icrası və prinsiplərə əməl edilməsi sahəsində ciddi problemlər qalmaqdadır. Plüralizm prinsipinə əməl etmək isə ümumiyyətlə yaddan çıxıb.
Hərdən mənə elə gəlir ki, AzTV bu baxımdan daha öndədir. Hazırda dövlət başçısı tərəfindən aparılan islahatlara dəstək baxımından ciddi müzakirələrin aparılması, aktual polemikaların təşkili, maraqlı tərəflərin iştirakı ilə diskussiyaların aparılmasına ehtiyac var.
Parlamentin, vətəndaş cəmiyyətinin və biznes sektorunun bu islahatlarda iştirakı və dəstəyi ilə bağlı, verə biləcəyi töhfələrlə bağlı efirdə faydalı bir şey tapmaq çox çətindir. Təəssüf ki, bu tip müzakirələr hələlik yalnız sosial mediada aparılır. AzTV və İTV-yə dövlət büdcəsindən xeyli vəsaitlər ayrılır. Ümid edirəm ölkədə KİV siyasətini müəyyən edənlər efir məkanının canlandırılmasına, dövlət büdcəsindən maliyyələşən TV-lərdə zəruri islahatların aparılmasına ciddi diqqət yetirəcəklər",-deyə O. Gündüz vurğulayıb.