Bu ilin ilk 11 ayı ərzində xarici ölkələrə 1 milyard 532 milyon dollar dəyərində qeyri-neft məhsulu ixrac olunub. Yeniavaz.com İqtisadi İslahatların Təhlili və Kommunikasiya Mərkəzindən açıqlanan məlumatlara istinadən bildirir ki, ötən ilin müvafiq dövrü ilə müqayisədə 2018-ci ilin yanvar-noyabr ayları ərzində qeyri-neft sektoru üzrə ixrac 145 milyon dollar və ya 10,5 faiz artıb. Bu ilin yanvar-noyabr ayları ərzində Rusiyaya 555,4 milyon, Türkiyəyə 321,3 milyon, İsveçrəyə 123,3 milyon, Gürcüstana 117,1 milyon və Qazaxıstana 41,1 milyon dollar dəyərində qeyri-neft məhsulu ixrac olunub.
Ötən ilin müvafiq dövrü ilə müqayisədə 2018-ci ilin ilk 11 ayı ərzində Rusiyaya qeyri-neft ixracı 12%, Türkiyəyə 22%, Qazaxıstana 42% artıb, İsveçrəyə 8%, Gürcüstana isə 3% azalıb.
2018-ci ilin yanvar-noyabr ayları ərzində ixrac edilən qeyri-neft sektoruna aid malların siyahısında pomidor (162,2 milyon dollar) birinci, qızıl (sikkə kəsilməsində istifadə olunmayan, digər emal olunmamış formalarda – 107,2 milyon dollar) ikinci olub. Xurma isə (89,1 milyon dollar) bu siyahıda üçüncü yerdə qərarlaşıb.
Bu ilin noyabr ayında qeyri-neft sektoru üzrə ixracda xurma (45,2 milyon dollar) birinci, qabığı təmizlənmiş meşə fındığı (14,5 milyon dollar) isə ikinci olub. Bu siyahıda pomidor (12,3 milyon dollar) isə üçüncü yeri tutub.
Tətbiqimizi yükləyə bilərsiniz
