Bu ilin sonuna kimi dünyada avtomobil satışları rekord səviyyəyə yüksələcək. Yeniavaz.com avtomobil istehsalçılarının açıqladığı proqnozlara istinadən bildirir ki, 2018-ci il ərzində ümumilikdə 81 milyon 570 min ədəd avtomobilin satılacağı gözlənilir. Bu göstəricinin ötən ilki rəqəmlərlə müqayisədə 2 milyon 550 min ədəd çox olacağı proqnozlaşdırılır.
Məlumat üçün bildirək ki, ötən ilin əvvəlində 2017-ci il üçün açıqlanan proqnoz göstərici 78 milyon 590 min ədəd olsa da, reallaşan satış bundan artıq olub - 79 milyon 20 min.
Qeyd edə ki, bu il satılması proqnozlaşdırılan avtomobillərin sayı 1990-1999-cu illər ərzində satılan avtomobillərin sayından 2,1 dəfə çox olacaq. 1990-1999-cu illər ərzində dünyada 39,2 milyon ədəd avtomobil satılıb. 2000-2014-cü illərdə isə dünyada 54 milyon 890 min avtomobil satılıb. 2014-cü ildən etibarən avtomobil satışında kəskin artımlar qeydə alınıb.
Avtomobil satışlarının artmasının əsas səbəbi kimi Böyük Britaniya, Almaniya, İsveç, Polşa və digər Avropa İttifaqı ölkələrində avtomobil sənayesində müşahidə olunan canlanma və o cümlədən də Asiya və Şimali Amerikada avtomobillərə olan tələbatın artması göstərilir.
Avtomobillərə olan tələbatın ən çox olduğu ölkələr isə Asiya ölkələri hesab olunur. 2008-2016-cı illər ərzində İndoneziya və Hindistanda avtomobil satışları kəskin artıb. Bunlardan başqa Çində avtomobil satışları 2016-cı ildə əvvəlki illə müqayisə avtomobil satışları 4 dəfə artıb.
Asiya bazarında artan tələbatı nəzərə alan nəhəng avtomobil istehsalçıları bu bölgədə istehsal müəssisələri qurmağa başlayıblar. "General Motors", "Volkswagen" kimi aparıcı avtomobil istehsalçıları Çində avtomobil istehsalını genişləndirməyə başlayıblar.