Sabirabad rayonunun Şəhriyar kəndində 6 nəfərin ölümünə səbəb olan qəzaya Vətəndaşların Əmək Hüquqlarının Müdafiəsi Liqasının sədri, hüquq müdafiəçisi Sahib Məmmədov münasibət bildirib. Yeniavaz.com xəbər verir ki, Sahib Məmmədov hadisə ilə bağlı 5 vacib məqama aydınlıq gətirib:
"1. Əvvəla, bu hadisənin istehsalatda baş verən bədbəxt hadisə olub-olmaması barədə. Bildiyim budur ki, faciə ailə-fermer təsərrüfatı ilə bağlıdır. Faciə ailə öz traktor və qoşqu vasitəsindən istifadə etməklə tarlaya gedəndə baş verib. Əmək Məcəlləsində ailə kəndli təsərrüfatı üzvlərinin əmək münasibətlərinin tənzimlənməsi xüsusiyyətləri adlı bölmə var. Amma burada münasibətlərin tənzimlənməsi, o cümlədən əməyin mühafizəsi məslələri həllini tapmır. Yəni ərin öz arvadı ilə və ya kişinin (qadının) öz uşaqları ilə əmək müqaviləsi bağlanması açıq qalır. Bu şifahi də ola bilər. Baş vermiş faciə istehsalat qəzasından daha çox bir ailənin faciəsidir. Onlar bu mexanizmlə tarlaya yox, toya da gedə bilərdilər.
2. Belə nəqliyyat vasitəsi ilə adamları daşımaq olarmı? Əlbəttə, yox. İnsan daşınması üçün nəqliyyat vasitəsi uyğun olmalıdır. Bunun qadağan olunmasının isə mexanizmi yoxdur. Kəndarası yolda YPX gəlib heç kəsi cərimələyən deyil. Bu real məsələ deyil.
3. Vaxtı keçmiş, aşınaraq sıradan çıxmış bu mexanizmlərdən istifadə etmək olarmı? Əslində yox. Amma bu gün müvafiq dövlət orqanlarının kəndlilərin kolxoz və sovxozlardan qalan texnikanı işlətməsini qadağan etməsi necə qarşılanar? Bu texnikanı zorla yığıb təkrar metal emalı müəssisələrinə versələr, bu gün hökuməti ittiham edənlərin hay-küyünü təsəvvür edirsinizmi? Mümkün deyil.
4. Baş verən faciə ilə bağlı zərərin əvəzi (o cümlədən insanların vəfat etməsi nəticəsində yaranan zərər) kim tərəfindən ödənilməlidir?
Əgər bu istehsalat qəzası olsaydı, işçilərlə əmək müqaviləsinin bağlanıb-bağlanmamasından, onların icbari sığortaya cəlb-edilib-edilməməsindən asılı olmayaraq zərəri işəgötürən ödəməli idi. Bu halda isə heç kəs. Təbii ki, humanizm baxımıdan hakimiyyət orqanları nə isə edəcəklər. Amma hüquqi baxımdan sığorta yoxdur və sığorta hadisəsi baş verməyib.
5. Cinayət hadisəsi baş veribmi? Baş verib. Ehtiyatsızlıqdan iki və daha çox şəxsin ölümü baş verib. Amma cinayəti edən də ailənin başçısıdır, yaxud ailənin digər üzvüdür".