Aprelin 21-də prezident İlham Əliyev Kənd Təsərrüfatı naziri vəzifəsinə İnam İmdad oğlu Kərimovun təyin edilməsi haqqında sərəncam imzalayıb. Yeniavaz.com xəbər verir ki, İnam Kərimov 6 iyun 1977-ci ildə Bakı şəhərində anadan olub. Azərbaycan Respublikası Əmək və Əhalinin Sosial Müdafiəsi Nazirinin müavini Mətin Kərimlinin böyük qardaşıdır. Əslən Göyçə mahalının Kəsəmən kəndindəndir. Qeyd edək ki, Kəsəmən kəndi tanınmış ictimai-siyasi xadimləri ilə məşhurdur. Bu kəndin yetirmələrindən olan Qəşəm Aslanov Azərbaycan SSR -də yüksək vəzifələr daşıyıb. Abşeron, Şuşa və İsmayıllı rayonlarında 1-ci katib vəzifələrini icra edib. Hazırda Xızı rayon İcra Hakimiyyətinin başçısı olan Xəzər Aslanov mərhum Qəşəm Aslanovun oğludur. Qəşəm Aslanovun digər bir oğlu polkovnik Rövşən Aslanov Fövqəladə Hallar Nazirliyi Gəncə Regional Mərkəzinin rəisi olub. Kəsəmən kəndindən olan Sərdar Kərimov Azərbaycan Səhiyyə nazirinin müavini olub. "20 Yanvar" faciəsinin qurbanlarından olan, gənc şair Ülvü Bünyadzadə də əslən Kəsəmən kəndindəndir.
1984-1994-cü illərdə Bakı şəhərində Humanitar Fənlər Gimnaziyasında təhsil alıb. 1994-1995-ci illərdə ABŞ-ın İndiana ştatında “Richmond High School” da təhsilini davam etdirib. 1995-ci ildə Bakı Dövlət Universitetinin Beynəlxalq hüquq fakültəsinə qəbul olunub. 1998-2000-ci illərdə Fransanın Strasburq Universitetində hüquq üzrə bakalavr, 2000-2002-ci illərdə isə Sarbonna Universitetində hüquq üzrə magistr təhsili alıb.
2002-2004-cü illərdə Azərbaycan Respublikası Prezidentinin Administrasiyasında məsləhətçi, 2004-2012-ci illərdə baş məsləhətçi vəzifələrində çalışıb.
2005-2012-ci illərdə Azərbaycan Respublikasının Korrupsiyaya qarşı mübarizə üzrə Komissiyasının katibi olub.
2005-2012-ci illərdə Avropa Şurasının Korrupsiyaya qarşı Dövlətlər Qrupunda (GRECO) Azərbaycan Respublikasının nümayəndə heyətinə rəhbərlik edib.
Azərbaycan Respublikasının Prezidentinin 7 sentyabr 2012-ci il tarixli sərəncamı ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri təyin edilib.
“Azərbaycan Respublikasında turizmin inkişaf etdirilməsi ilə bağlı bir sıra tədbirlər haqqında” Azərbaycan Respublikası Prezidentinin 2016-cı il 27 dekabr tarixli 1179 nömrəli Fərmanı ilə tərkibi təsdiq edilən Azərbaycan Respublikası Turizm Şurasının üzvüdür.
“Azərbaycan Respublikasında biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı əlavə tədbirlər haqqında” Azərbaycan Respublikası Prezidentinin 2016-cı il 13 iyul tarixli 2199 nömrəli Sərəncamı ilə tərkibi təsdiq edilən Komissiyanın üzvüdür.
Azərbaycan Respublikası Prezidentinin 2016-cı il 20 aprel tarixli 1984 nömrəli Sərəncamı ilə tərkibi təsdiq edilən İqtisadi İslahatların Təhlili və Kommunikasiya Mərkəzinin Müşahidə Şurasının üzvüdür.
Sarbonna Universitetində hüquq üzrə doktor (docteur en droit) elmi dərəcəsi alıb.
İngilis, fransız, fars və rus dillərini bilir.
Evlidir, iki övladı var.
Tətbiqimizi yükləyə bilərsiniz
