Fəxri Ağayev: “Kursun məqsədi Azərbaycana faydalı olmaqdır”
Azərbaycanda sahibkarlar və şirkət rəhbərləri üçün biznes kurs keçirilir. Yeniavaz.com xəbər verir ki, kursun təşkilatçısı və təlimçisi tanınmış peşəkar idarəçi, idmançı, yazıçı, bloqqer Fəxri Ağayevdir.
F. Ağayev biznes kurs haqqında saytımıza məlumat verərkən bildirdi ki, uzun müddətdir Azərbaycanda iş dünyasında çox ciddi maariflənməyə ehtiyac olduğunu düşünür: “Davamlı olaraq sosial şəbəkələrdə, bloqumda bu mövzularda tənqidi yazılar yazıram. Amma əsas iş ölkədəki problemləri tənqid etməklə bitməməlidir. Mənim bu vaxta qədər ki, bilik və savadım imkan verir ki, həm də bu mövzuda dəstək verim. Ona görə, ölkədə baş verən ilk devalivasiyadan sonra qərar verdim ki, sahibkar və idarəçilərimiz üçün üst səviyyədə biznes kurs hazırlayım. Sahibkar və idarəçilər kimlərdir? Bu adamlar, iş həyatı dolu olan, həftədə 7 gün işləyən, yorğun adamlardı. Ona görə, xaricə gedib müasir təhsil almağa zamanları yoxdur. Amma ölkədə də, gedib heç yerdə uzun zaman keçirə bilmirlər. Bu mənada düşündüm ki, 25 illik iş və 17 illik rəhbərlik təcrübəmin şirəsini sıxım və onlara təqdim edim. 3 il müddətində bu kurs üzərində çalışdım, hazırladım, bu müddətdə hər gün bunun üzərində işləyərək, bu kursu ərsəyə gətirdim. 2018-ci ilin yanvar ayından etibarən kursu tədris etməyə başladım”.
“Kursdan sonra bizim iştirakçılarla əlaqələrimiz kəsilmir”
Peşəkar idarəçi qeyd etdi ki, biznes kursun məqsədi, sahibkarlara və şirkət rəhbərlərinə idarəçiliyin əsasları, biznesin ana məqsədləri, idarəçiliyin funksiyalarını, müştəri, satış, marketinq mövzularını stratejik baxımdan başa salmaqdır: “Bundan əlavə olaraq Azərbaycan iş dünyasında ən böyük problem kommunikasiyadır. Biz sahibkar və iş adamları müştərilərlə, əməkdaşlarımızla, rəhbərliklə və öz rəqiblərimizlə ünsiyyət qurmaqda çətinlik çəkirik. Ona görə, ikinci əsas məlumat bloku məhz kommunikasiya və ünsiyyət bacarıqları barədədir. Bu kursun, bir neçə əsas məqamları var. Birinci növbədə, kursda qətiyyən nəzəri heç nə yoxdur. Veirlən məlumatlar tamamilə, şəxsi iş təcrümə əsaslanır. İkincisi, kursun üstün və seçilən xüsusiyyətlərindən biri odur ki, bu kurs müddətində Azərbaycanda şirkətlərdə baş verən real hadisələri sahibkar və rəhbərlərlə birlikdə baxaraq, həll edirik. Üçüncü vacib məqam isə budur ki, kursdan sonra bizim kurs iştirakçıları ilə əlaqələrimiz kəsilmir, əksinə yeni tanışlıqlar yaranır”.
“Mənim bu kursdakı məqsədim pul qazanmaq deyil”
F.Ağayev kurs iştirakçılarının kurs barədə fikirlərini də danışdı. Bildirdi ki, kurs barədə iştirakçıların fikirləri ilə daha ətraflı “agaev.az” (http://agaev.az/idarecilik-kursu-istirakci-reyleri/) bloqundan tanış olmaq olar: “Kursda iştirak edən Azərbaycanda fəaliyyət göstərən Türkiyə vətəndaşı iş adamı etiraf edir ki, kursa həvəssiz gəlmişdi. Türkiyənin ən tanınmış spikerlərinin təlimlərində olan iş adamı bu kursun onlardan qat-qat faydalı olduğunu bildirdi. İki gün ərzində 18 saat, şənbə-bazar günləri, dayanmadan, maksimum aktiv və dinamik insanlara məlumat verilir. Bu kursa hər istəyən gəlib iştirak edə bilməz. Müsahibə keçirirəm, ona əsasən inkişaf etmək istəyən, öz zəhmətilə sahibkar və idarəçi olan insanlar kursumuzda iştirak edir. Kurs ödənişlidir. Kursda iştirak üçün minimum yaş həddi 28 olmalıdır. Sahibkarlıq və idarəçilikdə müəyyən yerlərə çatmış insanlar olmalıdır. Yəni, mən dünən sahibkarlığa başladım, amma hələ işçim yoxdur, işləyəcəm, deyən adamlar iştirak edə bilməz. Bundan əlavə bəxtə və möcüzəyə inanan insanlarla işimiz olmur. Yəni, hər şey zəhmət nəticəsində əldə olunmalıdır. Müsahibədə 30 nəfərdən 5-6 nəfər seçilir. İstəyənlər çoxdur, amma yox deyirəm. Çünki, mənə onların pulu lazım deyil. Özlərinə də deyirəm ki, boş yerə pul xərcləməyin, axı, bu sizə faydalı olmayacaq. Azərbaycan tarixində ilk dəfədir ki, kimsə təlim keçirir, iştirak etmək istəyənləri seçərək qəbul edir, çoxunu qəbul etmir. 30 nəfərdən 5-ni seçmişəm, çünki, bu işdə dürüst olmaq lazımdır. İstəmirəm onlar gəlib mənə boş yerə pul ödəsin. Mənim bu kursdakı məqsədim pul qazanmaq deyil. Burdan aldığım hər şeyi bu kursa sərf edirəm. Kursumuzun keçirildiyi bina, otaq, yeməklərimiz, çay, su və s. hamısı yüksək səviyyədədir”.
“Ölkənin inkişafı üçün iki intellektual sərmayəsi var - alimləri və sahibklarları”
Biznes kursun məqsədinin Azərbaycana faydalı olmaq olduğunu bildirən təlimçinin sözlərinə görə, kursun iştirakçılara ən böyük dəstəyi kursdan sonra da davam edir: “Çünki, Azərbaycanda “Sahibkarlar və İdarəçilər Cəmiyyəti” qurmağı planlaşdırıram. Bu kursda iştirak edən hər kəs həmin cəmiyyətin üzvü olacaq. Ayda bir dəfə, həftə sonu kursda iştirak edən hər kəs, 5 ulduzlu otellərin birində görüşərək, səhər idman edirik, hovuzda üzürük, qəlyanaltı edirik, ən əsası hamı bir-birilə tanış olur. Klinika sahibi, inşaat şirkətinin rəhbəri, farmakologiya şirkətinin qurucusu, reklam şirkətinin təsisçisi, İT şirkət ortağı və s. bir masada əyləşib yemək yeyərək, bu vaxta qədər bir-birini tanımayan insanlar bir-birinə fayda verməyə başlayırlar. Cənab prezident 25 apreli sahibkar günü təyin edəndə məni ASAN radioya dəvət etdilər. Orda dedim ki, hər bir ölkənin inkişafı üçün iki intellektual sərmayəsi var - alimləri, müəllimləri və sahibklarları. Biz ölkə, dövlət, xalq olaraq sahibkarlara sahib çıxmalıyıq. Bu gün mənim sahibkarlara verə biləcəyim bilik varsa, mən nəinki onlara o biliyi verirəm, hətta elə bir platforma yaradıram ki, onlar bir-birinə faydalı olsunlar. Dolayısıyla ölkə iqtisadiyyatına xeyir versinlər”.
Rasim Məmmədli