Namiq Namazov 16 yaşı tamam olduğu üçün Mingəçevir Uşaq Nevroloji Sanatoriyasından çıxarılıb. O, 1 yaşından 16 yaşınadək bu sanatoriyada yaşayıb. Hazırda səfil həyatı yaşayır. Bu barədə "Yeniavaz.com" saytına Mingəçevir sakinləri məlumat veriblər.
Sakinlərin sözlərinə görə, bir yanacaq doldurma məntəqəsinin işçiləri Namiqə qalmaq üçün sığınacaq verib, onun gündəlik yemək tələbatını ödəyirlər.
Həmin ərazidə Namiq Namazovla görüşdük.
"1 yaşımdan uşaq evində böyümüşəm. Anamı xatırlamıram. Heç adını da bilmirəm, amma atamın adı Sabir, soyadı Namazovdur. Anamı axtarıram. Lakin müraciətlərimə baxmayaraq, heç bir nəticə olmayıb. Xoşqədəm Hidayətqızının verilişinə çıxmaq istəyirəm. Bəlkə o mənim valideynlərimi tapar. Qalmağa yerim olmadığına görə küçələri gəzirəm. Sağ olsun yanacaqdoldurma məntəqəsinin işçiləri, onlar mənə yer veriblər, müvəqqəti orada qalıram. Xahiş edirəm, mənə kömək olunsun. Yoxsa belə yaşamaq mümkün olmayacaq",-deyə Namiq Namazov vurğuladı.
Esmira Hidayətova, Mingəçevir