Azərbaycan mikrokredit götürənlərin sayına görə liderdir

Qazaxıstan mikrokredit portfelinin həcminə görə MDB məkanında lider ölkədir. Bu barədə “Microfinance Information Exchange” beynəlxalq təşkilatının hesabatında bildirilir. Hesabata əsasən, bu ölkənin MDB üzrə verilmiş mikrokreditlərdə 33% və yaxud 464,3 mln. ABŞ dolları həcmində payı var.

İkinci yerdə 24% payla və yaxud 337,6 mln. dollarlıq göstərici ilə Azərbaycan, 3-cü yerdə isə 13,6% payla və yaxud 191 mln. dollarlıq göstərici ilə Tacikistan, 4-cü yerdə 11,5% payla və yaxud 162 mln. dollarlıq göstərici ilə Ermənistan, 5-ci yerdə isə 7% və yaxud 98 mln. dollarlıq göstərici ilə Qırğızıstan qərarlaşıb.

Rusiyada 86,3 mln. dollar (6,1%), Özbəkistanda 37,1 mln. dollar (2,6%), Moldovada isə 30 mln. dollarlıq (2,1%) mikrokredit verilib. Ukraynada isə mikrokredit portfeli yox dərəcəsindədir. Bu ölkədə cəmi 700 min dollarlıq göstərici qeydə alınıb.

Mikrokredit götürənlərin sayına görə isə Azərbaycan MDB-də birincidir - 274,8 min nəfər mikrokredit portfelində pay sahibidir. Bu göstərici Qazaxıstanda 254,5 min nəfər, Tacikistanda 232,4 min nəfər, Qırğızıstanda 156 min nəfər, Ermənistanda 116,1 min nəfər, Rusiyada 36 min nəfər, Moldovada 19,3 min nəfər, Özbəkistan və Ukraynada isə 700 nəfərdir.Report