Bakı əhalisinin sayına görə Müstəqil Dövlətlər Birliyinə (MDB) daxil olan ölkələrin şəhərləri arasında 5-ci yerdə qərarlaşıb. "Yeniavaz.com" MDB ölkələri tərəfindən əhalinin sonuncu siyahıyalınması ilə bağlı açıqlanan statistik göstəricilərə istinadən bildirir ki, Bakı şəhərində 2 milyon 92 min nəfər yaşayır. MDB-yə daxil olan ölkələrin şəhərlərinin sıralamasında əhalisinin sayına görə ilk sırada Moskva yer alıb. Rusiyanın paytaxtında 11 milyon 613 min nəfərin yaşadığı bildirilir. İkinci sırada daha bir Rusiya şəhəri - Sankt-Peterburq qərarlaşıb. Rusiyanın şimal paytaxtı hesab olunan bu şəhərdə isə 4 milyon 953 min insan yaşayır. Əhalisinin sayı çox olan MDB şəhərlərinin sıralamasında 3-cü yerdə Ukraynanın paytaxtı Kiyev dayanır. Kiyevdə 2 milyon 842 min insanın yaşadığı bildirilir. 4-cü sırada yera alan Özbəkistanın paytaxtı Daşkənddə isə 2 milyon 310 min insan yaşayır.
Ümumilikdə MDB-də əhalisinin sayı milyondan çox olan 22 şəhər mövcuddur. Bunlardan 13-ü Rusiyada (Moskva, Sankt-Peterburq, Novosibirsk, Yekaterinburq, Samara, Nijniy Novqorod, Kazan, Omsk, Çelyabnsk, Rostov-na-Don, Ufa, Volqoqrad və Perim) yerləşir. Milyondan çox insanın yaşadığı daha 4 şəhər isə Ukraynaya məxsusdur. Bu şəhərlər paytaxt Kiyev, Xarkov, Odessa və Dnepropetrovskdir. Bunlardan başqa MDB-də əhalisinin sayı milyondan çox olan 22 şəhərin siyahısına Özbəkistan, Azərbaycan, Belarus, Qazaxıstan və Ermənistanın hər birindən bir şəhər daxil olub. Bunlar adları sadalanan ölkələrin paytaxt şəhərləridir - Daşkənd, Bakı, Minsk, Alma-Ata və Yerevan.
Moskva 11 612 943
Sankt-Peterburq 4 953 219
Kiyev 2 841 674
Daşkənd 2 309 300
Bakı 2 092 400
Minsk 1 900 800
Novosibirsk 1 498 921
Alma-Ata 1 472 866
Xarkov 1 451 028
Yekaterinburq 1 377 738
Nijniy Novqorod 1 254 592
Samara 1 169 184
Kazan 1 161 308
Omsk 1 156 583
Çelyabnsk 1 143 458
Yerevan 1 129 000
Rostov-na-Don 1 096 448
Ufa 1 072 291
Volqoqrad 1 018 739
Odessa 1 013 108
Dnepropetrovsk 1 000 238
Perim 1 000 672