Avropa qarşıdakı sammitdə Türkiyənin Avropa İttifaqına (Aİ) üzvlüyünə dair danışıqların dayandırılması ehtimalını müzakirə etməlidir. “Yenivaz.com”un TASS-a istinadən verdiyi məlumata görə, bunu Almaniya Kansleri Angela Merkel Bundestaqda çıxış edərkən deyib. O bildirib: “Mən Aİ-nin qarşıdakı sammitində Türkiyə ilə münasibətləri, o cümlədən danışıqları təxirə salmaq və dayandırmaq barədə məsələni müzakirə etməyi təklif edəcəm”. A. Merkelin sözlərinə görə, Aİ-nin üzv ölkələri bu məsələdə həmrəylik nümayiş etdirməlidirlər: “Biz Ərdoğanın gözləri qarşısında Avropa İttifaqında dalaşsaq qəribə olardı”. Kansler əlavə edib ki, Türkiyədə hadisələrin inkişafı ciddi qayğı yaradır: “Türkiyə getdikcə və sürətlə hüquqi dövlət normaları yolundan çıxır”. Xatırladaq ki, ötən gün Almaniya Nazirlər Kabinetinin rəsmi nümayəndəsi Şteffen Zaybert bəyan etmişdi ki, Aİ ölkələri liderlərinin növbəti sammiti oktyabra planlaşdırılıb.