Bu ilin ilk yarısına olan məlumata görə, Azərbaycanda 770 min 920 nəfər sahibkar fəaliyyət göstərir. Son bir il ərzində fərdi sahibkarların sayı 159 min 526 nəfər və ya 26,1% artıb. "Yeniavaz.com" Dövlət Statistika Komitəsindən açıqlanan məlumatlara istinadən bildirir ki, ölkə üzrə məşğul əhalinin təxminən hər 6 nəfərdə biri sahibkardır. Statistika Komitəsinin məlumatına görə, ölkədə 4 milyon 792,7 min məşğul insan var.
Məlumat üçün onu da qeyd edək ki, son bir ildə sahibkarların sayı ən çox Gəncə-Qazax iqtisadi rayonunda artıb. Belə ki, 2016-cı ilin ilk yarısında Gəncə-Qazax iqtisadi rayonunda 80,8 min nəfər sahibkar olduöu halda, bu ilin ilk yarısında sahibkarların sayı 11,8 min nəfərə yüksəlib. Nəticədə ölkədəki fərdi sahibkarların 14,5%-i Gəncə-Qazax iqtisadi rayonunun payına düşüb. Ən çox sahibkar isə Bakı şəhərində fəaliyyət göstərir. Ümumi sahibkarların 29,1%-i və ya 224,1 min nəfəri Bakıda qeydə alınıb. Sahibkarların 161,8 min nəfəri və ya 21%-ə isə Aran iqtisadi rayonunun payına düşüb. Sahibkarların ən az olduğu bölgələr isə Kəlbəcər-Laçın iqtisadi rayonu (2,6 min nəfər), Yuxarı Qarabağ iqtisadi rayonu (18,4 min nəfər) və Naxçıvan Muxtar Respublikası (22,7 min nəfər) hesab olunur.