DİM rus bölməsinin abituriyentlərinə haqsızlıq edir - Təhsil eksperti

"Artıq 2017-2018-ci tədris ili üçün ali məktəblərə qəbul imtahanları başa çatıb. 29 iyul - 10 avqust tarixlərində isə qəbul imtahanlarında topladıqları ballar müsabiqə şərtlərini ödəyən abituriyentlər ixtisas seçimi etməlidir. Məlum olduğu kimi, Dövlət İmtahan Mərkəzi (DİM) öncədən israrla elan etdiyi müsabiqə şərtlərini dəyişdi və proqnozu özünü doğrultmadı". "Yeniavaz.com" saytı xəbər verir ki, bunu təhsil üzrə ekspert Kamran Əsədov bildirib.

Onun dediyinə görə, yeni müsabiqə şərtlərinə əsasən, I, II, III, IV ixtisas qrupu üzrə müəyyən ali məktəblərin ixtisaslarına ümumi balı 150-dən çox olan abituriyent buraxılıb: "Belə ki, I ixtisas qrupu üzrə 30, II ixtisas qrupu üzrə 32, III ixtisas qrupu üzrə 9, IV ixtisas qrupu üzrə 9 ixtisasa 150 bal toplayan abituriyentlərə icazə verilir ki, elektron ərizə təqdim etsinlər. Lakin bu yalnız Azərbaycan bölməsinin abituriyentlərinə şamil olunur. Halbuki, DİM özünün 20 iyulda çap etdirdiyi və abituriyentlərin ixtisas seçimi etdiyi "Abituriyent 4" jurnalının rus bölməsi üzrə olanının 2 və 3-cü səhifəsində rus bölməsinin abituriyentləri üçün də bu universitetlərin adını, ixtisasını qeyd edib. Lakin "Abituriyent 4"ün əvvəlində cədvəldə rus bölməsinin abituriyentlərinə də seçim imkanı verildiyi göstərilsə də, jurnalın içində belə universitet və ixtisaslar yoxdur. Yalnız Rus bölməsi I ixtisas qrupunda 8, II ixtisas qrupunda 7 ixtisası seçə bilərlər. Lakin III və IV qrupların 150 bal toplayan abituriyentlər üçün heç bir ixtisas seçimi yoxdur. Baxmayaraq ki, "Abituriyen 4" jurnalının əvvəlində bu qeyd olunur. Azərbaycan bölməsinin 150 bal toplayan abituriyentləri IV qrup üzrə 80-ə yaxın ixtisas seçimi edə bildiyi halda, rus bölməsi yalnız IV qrup üzrə 15 ixtisas seçimi edə bilər. Rus bölməsi III və IV qrup isə 150 balla heç bir seçim edə bilmir. Hesab edirəm ki, 150 balla ixtisas seçimi edilməyə icazə verilən ixtisaslara necə ki, bal məhdudiyyəti tətbiq olunmur, vəziyyətdən çıxış yolu kimi bölmə məhdudiyyəti qoyulmamalıdır və ya rus bölməsi üzrə də abituriyentlərin ixtisas seçimi edə biləcəyi yerlər açmaq lazımdır".