2017/2018-ci illər mövsümü üçün heyətini gücləndirməyi davam etdirən “Qarabağ” ilk əcnəbi transferini reallaşdırıb. Klubun saytında yerləşdirilmiş məlumata görə, komanda ukraynalı qapıçı Anton Kanibolotski ilə 2 illik müqavilə imzalayıb. Qolkiper artıq Ağdam təmsilçisinin Avstriyada davam edən təlim-məşq toplanışına qoşulub.
Peşəkar karyerasına Ukraynanın “Dnepr” klubunda başlayan qolkiper daha sonra ölkəsinin digər klubu “Krivbass”a transfer olub. 2012-ci ildə Donetsk təmsilçisi “Şaxtyor”a keçən 29 yaşlı çərçivə qoruyucusu geridə qalan mövsümün sonuna kimi bu komandada forma geyinib.
A.Kanibolotski vaxtilə Ukraynanın 21 yaşlılardan ibarət yığma komandasına da dəvət alıb.