Minlərlə il əvvəl Avropa və Asiya qitələrini bir-birinə birləşdirən qədim İpək Yolu Çinin başçılıq etdiyi iri layihə sayəsində yenidən fəaliyyətə başlayır. “Yeniavaz.com”un “Yeni Şafak” qəzetinə istinadən verdiyi məlumata görə, layihənin ilk beynəlxalq təqdimatı mayın 13-də 28 ölkənin iştirakı ilə Çin Xalq Respublikasının sədri Si Cinpinin başçılıq etdiyi sammitdə həyata keçiriləcək. Mütəxəssislərin fikrincə, 1,4 trilyon dollara başa gəlməsi gözlənilən yeni İpək Yolunun məqsədi ABŞ-ın dünya iqtisadiyyatındakı liderliyinə son verməkdir. Yeni İpək Yolu layihəsi sürət qatarları marşrutları, hava limanları, elektreik stansiyaları və boru kəmərlərindən ibarət olacaq. Layihə Avropa və Asiyanın 60 ölkəsini bir-birinə bağlayacaq. Layihəyə daxil edilməsi planlaşdırılan ölkələr dünya əhalisinin 70 faizini təşkil edir. Digər tərəfdən, layihə çərçivəsinə daxil ediləcək 20 ölkədə indiyədək 50 milyard dollar məbləğində sərmayə yatırılıb.