"Aprel döyüşlərində şəhid olanların ailələrinə və yaralanan hərbçilərə böyük diqqət göstərildi. Ancaq bunun qanun şəklinə gətirilməsinə bizdə də ehtiyac var".
"Ermənistan hakimiyyəti və generalları etiraf etməsələr də, son illərdə cəbhə bölgəsində üzləşdikləri itkilərin yerini doldurmaqda çətinlik çəkirlər. Bunun obyektiv səbəbləri var". "Yeniavaz.com" saytının məlumatına görə, bunu politoloq Elxan Şahinoğlu bildirib.
"Birincisi, gənclər Ermənistanı tərk edirlər, onlar Dağlıq Qarabağda ölməmək üçün ya Rusiyaya işləməyə gedirlər, ya da Qərb dövlətlərinə mühacirət edirlər. İkincisi, Ermənistanın əhalisi onsuz da azalır, Azərbaycanın isə əksinə artır, yaxınlarda sayımız 10 milyona çatacaq. Bu tendensiya Ermənistanı narahat edir, döyüşməyə adam tapmaqda çətinlik çəkirlər. Ermənistan mülki müdafiə naziri Viqen Sarkisyan bu vəziyyətdən çıxış yolu kimi yeni ideya irəli sürüb: "Könüllü surətdə döyüş bölgələrində 3 il hərbi xidmət keçən hər gəncə xidməti bitirdikdən sonra 10 min dollar ödənəcək". Başqa sözlə, Ermənistanın müdafiə naziri gənclərə pulsuz ölməməyi təklif edir. Bu ideya yaxınlarda parlamentdə qanun şəklinə gələcək. Görək Ermənistanda 10 min dollara nə qədər gənc ölümə hazır olacaq",-deyə politoloq bildirib.
Ekspert bir məqama da diqqət yetirməyi lazım bilib: "Azərbaycanın insani potensialı kifayət qədərdir, döyüş bölgəsində xidmət problemimiz yoxdur. Aprel döyüşləri də göstərdi, az qala bütün əhali döyüşə atılmaq istəyirdi. Ancaq mənə elə gəlir ki, biz də cəbhə bölgəsində xidmət keçənlərə xüsusi imtiyazlar haqqında düşünməliyik. Doğrudur, aprel döyüşlərində şəhid olanların ailələrinə və yaralanan hərbçilərə böyük diqqət göstərildi. Ancaq bunun qanun şəklinə gətirilməsinə bizdə də ehtiyac var. Yəni ölümə gedən bilməlidir ki, qanun tələbi ailəsi, övladları daima dövlət qayğısı içində olacaqlar".
Tətbiqimizi yükləyə bilərsiniz
