Azərbaycanda kənd təsərrüfatının ikinci əhəmiyyətli sahəsi sayılan heyvandarlığın inkişaf etdirilməsi üçün yeni layihələrin həyata keçirilməsi nəzərdə tutulub. Bu barədə Kənd Təsərrüfatı Nazirliyinin Heyvandarlıq şöbəsinin müdiri Qabil Əbdüləliyev bildirib. Onun sözlərinə görə, bu layihələr sayəsində ölkədə heyvanların cins tərkibinin keyfiyyətinin artırılması, məhsuldarlığının yüksəldilməsi planlaşdırılır. Əsas diqqət isə qoyunçuluğa yönəldilib. Bu məqsədlə də yeni layihənin reallaşdırılması nəzərdə tutulub.
"Məlumdur ki, ölkədə suvarma sahəsində problemlər müşahidə edilir. Odur ki, heyvandarlıq sahəsinin rəqabətə davamlı və sabit olması üçün heyvanların cins tərkibinin daha məhsuldar və keyfiyyətli olmasına çalışırıq. Eyni zamanda bu səylərimizi qoyunçuluq sahəsinin də inkişafına yönəltmək niyyətindəyik", - deyə Q. Əbdüləliyev əlavə edib.
Azərbaycanın BMT-nin Ərzaq və Kənd Təsərrüfatı Təşkilatında (FAO) donor dövlət olduğunu xatırladan Q. Əbdüləliyevin sözlərinə görə, bu iştirak payı ilə ölkədə müəyyən layihələrin həyata keçirilməsi nəzərdə tutulub. "Bu məqsədlə FAO-ya qoyunçuluğun inkişafı üçün yeni layihə təqdim etmişik. Hazırda layihə nəzərdən keçirlir. Maldarlıqda olduğu kimi qoyunçuluqda da həm məhsuldarlığı yüksəltmək, həm də məhsulun istehsalı, emalı, eyni zamanda marketinqini yaxşılaşdırmağı düşünürük". report
Tətbiqimizi yükləyə bilərsiniz
