Avropa İnsan Haqları Məhkəməsi qərara alıb ki, Rusiya mitinq və toplaşma azadlıq hüquqlarını pozduğu 23 rusiyalıya 173,5 min avro ödəməlidir. “Yeniavaz.com”un “Moskovskiy komsomolets” qəzetinə istinadən verdiyi məlumata görə, söhbət 2009-2012-ci illərdə baş vermiş hadisələrdən, o cümlədən Eduard Limonovun təşəbbüs göstərdiyi “Strategiya 31” aksiyalarından gedir.
Xatırladaq ki, o və hər ayın 31-də keçirilən digər aksiya təşəbbüskarları hakimiyyətdən Konstitusiyanın 31-ci maddəsinə əməl edilməsini və hakimiyyətdən icazə almadan Rusiyanın şəhərlərinin küçələrində toplaşmağa icazə verilməsini tələb edirdilər. Məhkəmənin qəbul etdiyi qərar üzrə 28 hal arasında 16-sı “Strategiya 31”a aid olub. Ümumilikdə Avropa İnsan Haqları Məhkəməsində Rusiyadan 80 analoji şikayətə baxılır. Xatırladaq ki, 2016-cı ildə Dövlət Dumasının qəbul etdiyi qanuna əsasən, Konstitusiya məhkəməsi Avropa İnsan Haqları Məhkəməsinin qərarını reallaşdırmaqdan imtina edə bilər.