
Dünyada müsəlmanların sayı yaxın 9 il ərzində xristianların sayını üstələyə bilər.
Yeniavaz.com xəbər verir ki, bu barədə “New York Post” (NYP) nəşri “Pew Research Center”in (Pew Araşdırma Mərkəzi) yeni tədqiqatına istinadən məlumat yayıb.
Araşdırmaya görə, mövcud demoqrafik tendensiyalar davam edərsə, 2035-ci ildə dünyadakı müsəlmanların sayı təxminən 2,57 milyarda, xristianların sayı isə 2,52 milyarda çatacaq.
Müqayisə üçün qeyd edək ki, 2020-ci ildə dünyada 2,27 milyard xristian və 2,02 milyard müsəlman yaşayıb. Beləliklə, hazırda say baxımından üstünlük xristianlarda olsa da, proqnozlar yaxın illərdə bu nisbətin dəyişəcəyini göstərir.
Tədqiqatçıların hesablamalarına görə, 2070-ci ilə qədər müsəlmanların sayı 3,6 milyarda çatacaq. Bu, dünya əhalisinin təxminən 36 faizini təşkil edəcək. Xristianların sayının isə həmin dövrdə 3 milyarda yaxınlaşacağı, lakin dünya əhalisindəki payının 29 faiz civarında qalacağı gözlənilir.
Müsəlmanların sayı niyə daha sürətlə artır?
Araşdırmada müsəlman əhalisinin daha sürətlə artmasının əsas səbəbləri kimi yüksək doğum səviyyəsi və əhalinin yaş strukturunun daha gənc olması göstərilir.
Belə ki, 2020-2025-ci illərdə müsəlman qadınların hər birinə orta hesabla 3,1 uşaq düşüb. Xristian qadınlarda bu göstərici 2,5, digər dinlərə mənsub olan və ya heç bir dinə etiqad etməyən qadınlarda isə 1,6 olub.
Bundan başqa, 2020-ci ildə dünya müsəlmanlarının təxminən üçdə birinin yaşı 15-dən aşağı olub. Bu uşaqların yaxın illərdə reproduktiv yaşa çatması müsəlman əhalisinin artımını daha da sürətləndirə bilər.
Araşdırma müəllifləri vurğulayırlar ki, dinlərin tərəfdarlarının sayındakı dəyişiklikdə əsas rol insanların bir dindən digərinə keçməsi deyil, demoqrafik amillər oynayacaq.
Belə ki, 2020-2070-ci illərdə doğumların ölüm hallarını üstələməsi nəticəsində müsəlmanların sayının təxminən 1,6 milyard, xristianların sayının isə 792 milyon artacağı proqnozlaşdırılır.
Afrika dünyanın dini xəritəsini dəyişəcək
Araşdırmanın diqqətçəkən nəticələrindən biri də xristianlığın coğrafi mərkəzinin dəyişməsi ilə bağlıdır.
Proqnoza əsasən, 2070-ci ilə qədər dünyadakı xristianların 54 faizi Saharadan cənubda yerləşən Afrika ölkələrində yaşayacaq. 2020-ci ildə bu göstərici cəmi 31 faiz olub.
Beləliklə, xristianlığın demoqrafik ağırlıq mərkəzi tədricən Avropa və Şimali Amerikadan Afrikaya doğru dəyişəcək.
Bu proses nəticəsində Konqo Demokratik Respublikasının ABŞ-ni geridə qoyaraq dünyada ən çox xristianın yaşadığı ölkəyə çevriləcəyi gözlənilir. Proqnozlara görə, bu ölkədə xristianların sayı 2020-ci ildəki 92 milyondan 2070-ci ildə 299 milyona yüksələcək.
Müsəlmanların coğrafi bölgüsündə də dəyişiklik gözlənilir. Hazırda təxminən 227 milyon müsəlmanın yaşadığı Pakistanın 2070-ci ilə qədər 461 milyon müsəlmanla İndoneziyanı geridə qoyaraq dünyanın ən böyük müsəlman əhalisinə malik ölkəsinə çevriləcəyi ehtimal olunur.
ABŞ-də isə xristianlıq ən böyük dini qrup olaraq qalsa da, əhalinin əksəriyyətinin etiqad etdiyi din statusunu itirə bilər. Belə ki, ölkədə xristianların sayının 2020-ci ildəki 217 milyondan 2070-ci ildə 174 milyona düşəcəyi proqnozlaşdırılır.
Bununla belə, araşdırmada qeyd olunur ki, proqnozlar qaçılmaz gələcək ssenarisi deyil. Hesablamalar mövcud demoqrafik tendensiyaların dəyişməyəcəyi fərziyyəsinə əsaslanır. Müharibələr, epidemiyalar, təbii fəlakətlər və böyük sosial-iqtisadi dəyişikliklər isə dünyanın dini mənzərəsinə təsir göstərə bilər.
Murad Məmmədov
Tətbiqimizi yükləyə bilərsiniz