Alimlər müəyyən ediblər ki, immun hüceyrələri xroniki qan xəstəlikləri ilə mübarizə aparmaq qabiliyyətini qoruyub saxlayır, lakin müəyyən molekulyar siqnal onların fəaliyyətini zəiflədir.
Yeniavaz.com xəbər verir ki, araşdırmanın nəticələri “News Medical Life Sciences” jurnalında dərc olunub.
Məlumata görə, bu siqnalın bloklanması laboratoriya təcrübələrində immun cavabı gücləndirib və xəstəliyin eksperimental modelində ümidverici nəticələr göstərib.
Qeyd olunur ki, bu kəşf müəyyən genetik mutasiyaları olan xəstələr üçün yeni müalicə üsullarının hazırlanmasına zəmin yarada bilər.
Avstriyanın Krems şəhərində yerləşən Karl Landştayner Universitetinin rəhbərlik etdiyi beynəlxalq tədqiqat qrupu araşdırmanı mieloproliferativ neoplazmalar adlanan xroniki qan xəstəlikləri üzərində aparıb. Bu xəstəliklər zamanı sümük iliyi həddindən artıq çox qan hüceyrəsi istehsal edir. Nəticədə qan laxtalanması, sümük iliyində çapıq toxumasının yaranması və kəskin mieloid leykoz kimi ağırlaşmalar baş verə bilir.
“Alimlər CALR və JAK2 genlərində mutasiyalar olan xəstələrdə təbii killer hüceyrələrinin fəaliyyətini müqayisə ediblər. Bu immun hüceyrələri anormal və bədxassəli hüceyrələri məhv etmək qabiliyyətinə malikdir.
Araşdırma zamanı CALR mutasiyası olan xəstələrdə təbii killer hüceyrələrinin anormal hüceyrələri məhv etmək üçün zəruri maddələr istehsal etmək qabiliyyətini qoruduğu müəyyən edilib. Lakin həmin hüceyrələrin səthində immun cavabı zəiflədən TIGIT reseptorunun yüksək səviyyəsi aşkarlanıb. Eyni zamanda, bu xəstələrdə həmin reseptoru aktivləşdirə bilən CD112 molekulunun da səviyyəsinin yüksək olduğu müəyyən edilib.
Tədqiqatçılar antikorlardan istifadə edərək TIGIT reseptorunu bloklayıblar. Nəticədə təbii killer hüceyrələri laboratoriya şəraitində anormal hüceyrələri daha effektiv məhv etməyə başlayıb. Xəstəliyin eksperimental modelində aparılan müalicə, həmçinin qanda trombositlərin yüksək səviyyəsinin azalmasına meyil göstərib”, - məqalədə qeyd olunur.
Tədqiqat müəlliflərinin fikrincə, TIGIT-in bloklanması mieloproliferativ neoplazmaları və CALR mutasiyaları olan xəstələr üçün əlavə müalicə üsuluna çevrilə bilər:
“Mutasiyaya uğramış hüceyrələri birbaşa hədəf alan müalicə üsullarından fərqli olaraq, bu yanaşma orqanizmin öz immun sisteminin xəstəliyə qarşı daha effektiv mübarizə aparmasına kömək etməyi nəzərdə tutur.
Bununla belə, əldə olunan nəticələr hələ ilkin xarakter daşıyır. Metodun insanlar üzərində tətbiqi perspektivlərini qiymətləndirmək üçün onun effektivliyi və təhlükəsizliyi əlavə tədqiqatlarda yoxlanılmalıdır”.
Tətbiqimizi yükləyə bilərsiniz
