Meyvə və tərəvəzlərin tullantı hesab edilən hissələrində daha çox lif var – Araşdırma

Meyvə və tərəvəzlərin adətən tullantı kimi atılan qabıqları, toxumları və digər hissələri onların yeyilən lətindən daha çox qida lifi ehtiva edə bilər.
Yeniavaz.com xəbər verir ki, bu barədə London Kral Kollecinin alimlərinin apardığı araşdırmada bildirilib.
“International Journal of Food Sciences and Nutrition” jurnalında dərc olunan tədqiqat zamanı 12 növ bitki mənşəli məhsulun müxtəlif hissələrindəki lif miqdarı müqayisə edilib. Məlum olub ki, araşdırılan məhsulların 10-da qabıq, toxum və gövdə kimi adətən atılan hissələrdə qida lifinin miqdarı yeyilən hissələrlə müqayisədə daha çoxdur.
Araşdırmaya görə, məsələn, muskat balqabağının qabığı və toxumlarında hər 100 qram məhsula 9,25 qram qida lifi düşür. Qarpız qabığında bu göstərici 2,10 qram təşkil edir.
Ananasın qabığı və sərt özək hissəsində isə qida lifinin miqdarı meyvənin ləti ilə müqayisədə təxminən 5 dəfə çoxdur.
Bununla belə, bütün məhsullarda eyni nəticə qeydə alınmayıb. Belə ki, brokkolinin gövdəsində qida lifinin miqdarı onun çiçək hissəsi ilə müqayisədə 28,4 faiz az olub.
Alimlər hesab edirlər ki, meyvə və tərəvəzlərin daha çox hissəsindən istifadə etməklə gündəlik qida lifi qəbulunu artırmaq, eyni zamanda qida tullantılarını azaltmaq mümkündür.
Tədqiqatda qeyd olunub ki, Böyük Britaniyada yetkin insanların cəmi 4 faizi gündəlik tövsiyə olunan 30 qram qida lifini qəbul edir.
Araşdırma zamanı insanların meyvə və tərəvəzlərin adətən atılan hissələrini yeməkdən çəkinmələrinin səbəbləri də öyrənilib. Məlum olub ki, belə hissələrin həzm olunması ilə bağlı narahatlıqlar və onların qida dəyəri barədə etibarlı məlumatın azlığı bu seçimə təsir göstərir. İştirakçıları isə həmin məhsulların sağlamlıq üçün mümkün faydaları ətraf mühitə müsbət təsirlərindən daha çox motivasiya edib.
Tədqiqatın müəllifləri xəbərdarlıq ediblər ki, bu nəticələr bütün meyvə və tərəvəzlərin qabıqlarını yemək və ya onlardan çox miqdarda istifadə etmək tövsiyəsi kimi qəbul edilməməlidir. Araşdırma yalnız 12 növ məhsulu əhatə edib və qida lifinin miqdarı onların çiy vəziyyətində ölçülüb.
Mütəxəssislər bildirirlər ki, meyvə və tərəvəzlərin qabıq, toxum və digər hissələrinin istifadəyə yararlılığı məhsulun növündən və hazırlanma üsulundan asılıdır. Buna görə də hər bir məhsulun hansı hissəsinin təhlükəsiz şəkildə istehlak edilə biləcəyini nəzərə almaq vacibdir.