Cənubi Koreyanın Tequ şəhərində yerləşən Beyin Tədqiqatları İnstitutunun alimləri müəyyən ediblər ki, Alzheimer xəstəliyi zamanı xolesterinin beyində yığılması tullantı maddələri xaric edən mayenin hərəkətini poza bilər.
Yeniavaz.com xəbər verir ki, tədqiqatın nəticələri “bioRxiv” platformasında yayımlanıb.
Bildirilib ki, bu proses xəstəliyin irəliləməsi ilə əlaqəli ola bilər.
Tədqiqatçılar sağlam siçanlarla Alzheimer xəstəliyini modelləşdirmək üçün genetik cəhətdən dəyişdirilmiş siçanları müqayisə ediblər. Onlar onurğa beyni mayesinə boya yeridərək onun beyində necə hərəkət etdiyini izləyiblər.
Sağlam siçanlarda boya beyin toxumasına nüfuz edib, daha sonra tədricən xaric olunub. Alzheimer modeli olan siçanlarda isə boya əsasən damarların ətrafında toplanıb və toxumalara daha çətin keçib. Bundan əlavə, damarlar boyunca mayenin hərəkət etdiyi dar kanallar — perivaskulyar boşluqlar sağlam siçanlarla müqayisədə xeyli dar olub.
Alimlər boyanın bir hissəsinin Alzheimer xəstəliyi ilə əlaqəli beta-amiloid zülalının yaratdığı lövhəciklərdə toplandığını da müəyyən ediblər. Tədqiqatçıların fikrincə, bu lövhəciklər mayeni özündə saxlaya və onun dövranına mane ola bilər.
Ayrı bir təcrübə xolesterin mübadiləsi ilə bu pozuntular arasında mümkün əlaqəni üzə çıxarıb. Sağlam siçanlarda xolesterinlə əlaqəli markerin siqnalı zamanla zəiflədiyi halda, Alzheimer modeli olan heyvanlarda iki saat ərzində güclənib.
Müəlliflər hesab edirlər ki, xəstəlik zamanı xolesterin mübadiləsinin pozulması mayenin beynin tullantıları təmizləyən qlimfatik sisteminə axınını çətinləşdirə bilər. Bu sistem beta-amiloid kimi zülallar da daxil olmaqla, maddələr mübadiləsinin tullantılarının beyindən xaric edilməsində iştirak edir.
Bununla belə, alimlər hələ xolesterin yığılmasının beynin təmizlənmə mexanizmini pozduğunu, yoxsa xolesterinin artıq yaranmış pozuntular nəticəsində toplandığını müəyyən edə bilməyiblər.
Tətbiqimizi yükləyə bilərsiniz
