60 yaşdan yuxarı insanların güc məşqləri etməsi əzələ qüvvəsinin qorunmasına, sümüklərin möhkəmlənməsinə və beyin sağlamlığının dəstəklənməsinə kömək edir.
Yeniavaz.com xarici mətbuata istinadən xəbər verir ki, mütəxəssislərin fikrincə, yaş artdıqca əzələ kütləsini artırmaq çətinləşsə də, müntəzəm olaraq ağırlıq və müqavimət məşqləri etmək hərəkət qabiliyyətini və müstəqil yaşamaq imkanını qorumağa kömək edir.
ABŞ-nin Hyuston şəhərində yerləşən Beylor Tibb Kollecinin ortopedik cərrahiyyə kafedrasının dosenti Adil Əhməd bildirib ki, əzələlərin və əzələ kütləsinin sağlamlığa qoruyucu təsiri geniş şəkildə öyrənilib. Onun sözlərinə görə, bu təsir dayaq-hərəkət sisteminin sağlamlığından tutmuş beynin fəaliyyətinə qədər bir çox sahəni əhatə edir.
Mütəxəssis qeyd edib ki, əzələ kütləsinin artırılması demensiyanın inkişafını ləngitməyə və koqnitiv funksiyaların qorunmasına da kömək edə bilər.
Sümük və əzələ sağlamlığı üçün vacibdir
Güc məşqləri sümük sıxlığının qorunmasında da mühüm rol oynayır. Bu, xüsusilə yaşlı insanlar üçün əhəmiyyətlidir. Çünki yaş artdıqca sümük toxumasının parçalanması onun bərpasını üstələyə bilər.
50 yaşdan sonra sümük kütləsinin itkisi sürətlənir. Qadınlarda isə menopauzadan sonrakı ilk yeddi il ərzində sümük sıxlığının 20%-dək azalması mümkündür.
Əzələ kütləsi də yaşla əlaqədar tədricən azalır. Təxminən 30 yaşdan etibarən insan hər onillikdə əzələ kütləsinin 8%-dək hissəsini itirə bilər. 60 yaşdan sonra bu proses daha da sürətlənir.
Həftədə 2-3 dəfə məşq etmək faydalıdır
Tədqiqatlar yaşlı insanların güc məşqləri vasitəsilə əzələ kütləsini nə dərəcədə artıra biləcəyi barədə hələ birmənalı nəticə ortaya qoymasa da, bu məşqlərin əzələ qüvvəsini, əl sıxma gücünü və yerimə sürətini yaxşılaşdırdığı göstərilib.
“International Journal of Epidemiology” jurnalında dərc olunan araşdırmada 200 mindən çox yaşlı insan 15 il ərzində müşahidə edilib. Nəticələr güc məşqləri edən şəxslərdə ürək-damar xəstəlikləri, xərçəng və digər səbəblərdən ölüm riskinin belə məşqlər etməyənlərlə müqayisədə daha aşağı olduğunu göstərib.
Bu əlaqə qadınlarda və güc məşqləri ilə yanaşı aerob fiziki fəaliyyətlə də məşğul olan insanlarda daha nəzərəçarpan olub.
Məşqlərə necə başlamaq lazımdır?
Mütəxəssislər yaşlı insanlara güc məşqlərinə başlamazdan əvvəl həkimlə məsləhətləşməyi və düzgün texnikanı öyrənmək üçün təlimçiyə müraciət etməyi tövsiyə edirlər.
Adil Əhməd ilkin mərhələdə müqaviməti idarə olunan trenajorlardan istifadə etməyi, daha sonra isə sərbəst çəkilərə keçməyi məsləhət görür.
Başlanğıc üçün insanın öz bədən çəkisi ilə yerinə yetirdiyi hərəkətlər də kifayət edə bilər. Bunlara çömbəlmə, irəli addımlama hərəkətləri (lunge), divara söykənərək jim etmək və stuldan qalxıb-oturmaq daxildir.
Hərəkətləri düzgün texnika ilə səkkiz dəfə yerinə yetirmək mümkün olduqda yüngül qantellərdən və ya elastik müqavimət lentlərindən istifadə etməyə başlamaq olar.
Mütəxəssislər yükün tədricən artırılmasını, məşqlər arasında isə əzələlərin bərpası üçün bir və ya iki gün fasilə verilməsini tövsiyə edirlər.
Tətbiqimizi yükləyə bilərsiniz
