Panamada fövqəladə vəziyyət elan edilib

Panamada 9 oktyabrda baş verən 7,7 və 6,6 maqnitudalı zəlzələlərdən sonra fövqəladə vəziyyət elan edilib.
Yeniavaz.com “Associated Press” agentliyinə istinadən xəbər verir ki, təbii fəlakət nəticəsində 27 nəfər xəsarət alıb, ölən olmayıb. Zəlzələlərdən sonra 100-dən çox afterşok qeydə alınıb.
Prezidentlik naziri Xuan Karlos Orillacın açıqlamasına görə, yüzlərlə yaşayış binası, məktəb, tibb müəssisəsi, yol və digər infrastruktur obyekti zərər görüb. Milli Mülki Müdafiə Sisteminin məlumatına əsasən, təxminən 420 yaşayış binası və eyni sayda dövlət məktəbi, həmçinin yeddi otel, azı 13 kilsə və doqquz körpü zədələnib. Torpaq sürüşmələri və dağılmış yollar bəzi yaşayış məntəqələrini təcrid edib.
Ən çox zərər ölkənin Veraguas, Herrera, Cocle və Los Santos əyalətlərində qeydə alınıb. La Villa de Los Santos şəhərində yaşayış binaları və tarixi San Atanasio Katolik Kilsəsi uçub. Sakit okeandakı Kana adasında isə dəniz səviyyəsinin qalxması və güclü dalğalar səbəbindən təxminən 300 nəfər təxliyə edilib.
Zəlzələlər paytaxt Panama şəhərində su təmizləyici qurğunun fəaliyyətinə də təsir edib. Tokumen Beynəlxalq Hava Limanı fəaliyyətini müvəqqəti dayandırsa da, bir neçə saat sonra işini bərpa edib. Panama Kanalında gəmiçilik hərəkəti isə adi qaydada davam edir.
ABŞ axtarış-xilasetmə və zərərin qiymətləndirilməsi işlərinə dəstək məqsədilə mütəxəssislər göndərib və 5 milyon dollar humanitar yardım ayırıb. ABŞ hərbçiləri zərər çəkmiş icmalara təxminən 907 kiloqram ərzaq çatdırıb.