Səkkiz həftə ərzində hər gün 40 qram qoz yemək gənclərin ümumi emosional vəziyyətinin yaxşılaşmasına kömək edib. Alimlər həmçinin serotonin mübadiləsinin göstəricilərində və bağırsaq bakteriyalarının qozun tərkibindəki komponentləri həzm etməsi nəticəsində yaranan metabolitlərin səviyyəsində dəyişikliklər qeydə alıblar.
Yeniavaz.com xəbər verir ki, tədqiqatın nəticələri “Food & Function” jurnalında dərc olunub.
Araşdırmada 20-35 yaş arasında olan 31 sağlam insan iştirak edib. İştirakçıların orta yaşı 24 olub və onların təxminən 90 faizi qadınlardan ibarət olub.
Səkkiz həftə ərzində iştirakçılar hər gün axşam yeməyində 40 qram qoz yeyiblər və ya əksinə, qozu və ondan hazırlanan məhsulları qida rasionundan tamamilə çıxarıblar. İki həftəlik fasilədən sonra qruplar yerlərini dəyişiblər. Hər iki halda iştirakçılara Aralıq dənizi pəhrizinə əməl etmək tövsiyə olunub.
Qoz yeyilən dövrdən sonra emosional mənfi vəziyyətin ümumi göstəricisi nəzarət mərhələsi ilə müqayisədə orta hesabla 4,85 bal aşağı olub. Alimlər həmçinin əsəbilik və yorğunluğun azaldığını müəyyən ediblər. Lakin statistik düzəlişlərdən sonra bu fərqlər artıq əhəmiyyətli hesab edilməyib.
Eyni zamanda iştirakçıların sidiyində serotoninin parçalanmasının əsas məhsulu olan 5-hidroksiindol sirkə turşusunun (5-HIAA) konsentrasiyası artıb. Bu maddənin yüksək səviyyəsi, öz növbəsində, əhval-ruhiyyə pozuntularının daha az olması ilə əlaqələndirilib. Bununla belə, kortizol səviyyəsi, stressin qavranılması və ümumi özünüqiymətləndirmə göstəriciləri demək olar ki, dəyişməyib.
İştirakçıların orqanizmində A və B urolitinlərinin konsentrasiyası da artıb. Bunlar bağırsaq mikroflorasının qozda olan polifenolları həzm etməsi zamanı əmələ gələn maddələrdir. Hər iki metabolitin səviyyəsinin artması eyni zamanda 5-HIAA konsentrasiyasının yüksəlməsi ilə müşayiət olunub.
Tədqiqat müəllifləri vurğulayırlar ki, bu nəticələr qozun birbaşa olaraq beyində serotonin səviyyəsini artırdığını sübut etmir. Sidikdəki 5-HIAA bütün orqanizmdə serotonin mübadiləsini əks etdirir və beyindən kənarda baş verən proseslərdən də asılıdır. Alimlər serotonin sisteminin fəaliyyətini birbaşa mərkəzi sinir sistemində ölçməyiblər.
Onlar tədqiqatın müəyyən məhdudiyyətlərinin olduğunu da qeyd edirlər. Araşdırmada nisbətən kiçik bir qrup gənc iştirak edib və onların böyük əksəriyyəti qadınlardan ibarət olub.
Qeyd olunub ki, tədqiqat açıq şəkildə aparıldığı üçün iştirakçıların gözləntiləri də nəticələrə təsir göstərə bilər.
Mütəxəssislərin fikrincə, əldə edilən məlumatlar qoz istehlakı, bağırsaq mikroflorasının istehsal etdiyi metabolitlər və serotonin mübadiləsi arasında mümkün əlaqənin olduğunu göstərir. Lakin nəticələri qəti şəkildə təsdiqləmək üçün müxtəlif yaş qruplarını əhatə edən daha genişmiqyaslı və uzunmüddətli tədqiqatlara ehtiyac var.
Tətbiqimizi yükləyə bilərsiniz
