Almaniya kansleri Fridrix Merts Rusiya Prezidenti Vladimir Putini Ukraynaya qarşı müharibəni dayandırmağa və danışıqlara hazır olduğunu nümayiş etdirməyə çağırıb.
Yeniavaz.com DPA-ya istinadla xəbər verir ki, o bu çağırışı bazar günü Kiyevə səfəri zamanı edib.
“Cənab Putin, bu mənasız müharibəni dayandırın! Biz danışıqlara hazırıq, bu müharibənin başa çatması barədə bir-birimizlə danışmağa hazırıq. Lakin Ukraynanın mülki əhalisinə qarşı bu barbar hücumlar dayandırılmalıdır”, – Merts bildirib.
Kansler Ukrayna Prezidenti Volodimir Zelenski ilə birlikdə pilotsuz uçuş aparatının zərbəsi nəticəsində zərər görmüş Ukrayna Milli Elmlər Akademiyasına baş çəkib. Mertsin Kiyevə səfəri zamanı şəhərdə bir neçə dəfə hava həyəcanı siqnalı səslənib. Bazar günü daha əvvəl Ukrayna paytaxtının şimalında yerləşən körpü də zərbəyə məruz qalıb.
Elmlər Akademiyasının dağıdılmış binasının qarşısında çıxış edən Merts bildirib ki, onun fikrincə, bu cür hücumlar müharibənin mənasız olduğunu göstərir. O qeyd edib ki, akademiyaya zərbə Kiyevin mərkəzində, Almaniyanın səfirliyindən cəmi bir neçə yüz metr məsafədə baş verib.
“Bu gün səhər, sakit bir bazar günü Kiyevdə yenidən hava həyəcanı siqnalı səsləndi. Bunlar burada hər gün baş verən hərbi cinayətlərdir”, – kansler deyib.
Merts bildirib ki, Rusiya Ukraynanın qışa hazırlaşdığı bir vaxtda ölkənin infrastrukturuna hər gün zərbələr endirməkdə davam edir.
“Biz danışa bilərik, amma yalnız silahlar susanda – və silahlar susmalıdır”, – kansler deyib və Rusiya rəhbərliyini müharibəni dayandırmağa bir daha çağırıb.
Tətbiqimizi yükləyə bilərsiniz
