Dünyada orta ömür uzunluğu artaraq, koronavirus pandemiyasından əvvəlki səviyyəyə çatıb.
Yeniavaz.com xəbər verir ki, bu barədə məlumat Ümumdünya Səhiyyə Təşkilatının (ÜST) hesabatında öz əksini tapıb.
Xüsusilə, ÜST hesabatda ömür uzunluğu, ölüm səbəbləri və qlobal xəstəlik yükündəki tendensiyalar haqqında məlumatlar təqdim edib.
Hesablamalar 2000-ci ildən 2023-cü ilə qədər olan dövrü əhatə edib.
Sənədə görə, dünyada orta ömür uzunluğu 2023-cü ildə 73,3 ilə çataraq, pandemiyadan əvvəlki 2019-cu il səviyyəsinə - 73,4-ə yaxınlaşıb.
Digər tərəfdən, qeyri-infeksion xəstəliklər ölüm hallarının artan payını təşkil edib - 2000-ci ildəki 58%-ə qarşı 74%.
Sağlam ömür uzunluğu daha yavaş bərpa olunur: ÜST-ün məlumatına görə, 2023-cü ildə bu rəqəm 62,8 il olub (2019-cu illə müqayisədə 0,4 il az).
Diabet, demensiya, psixoloji pozğunluqlar qlobal xəstəlik yükünün dəyişən strukturunda getdikcə daha çox yer tutur.
Belə ki, təkcə demensiyadan ölüm halları üç dəfə artıb.
Hesabatda qeyd olunur ki, bu tendensiya gəlir səviyyəsindən asılı olmayaraq bütün ölkə qruplarında getdikcə daha çox özünü göstərir.
Digər tərəfdən, 2023-cü ildə dünyada qeydə alınan 61 milyon ölüm halının 33 milyonu ölümün 10 əsas səbəbinin payına düşüb. Qeyri-infeksion xəstəliklər bu 10 əsas səbəbdən 8-ni təşkil edib.
ÜST qeyd edib ki, ölüm hallarının əsas səbəbləri arasında ürəyin işemik xəstəliyi və insult da daxil olmaqla, ürək-damar xəstəlikləri, həmçinin xroniki ağciyər xəstəlikləri və aşağı tənəffüs yollarının infeksiyaları da daxil olmaqla, tənəffüs sistemi xəstəlikləri yer alıb.
2023-cü ildə ilk dəfə olaraq yoluxucu xəstəliklər aşağı gəlirli ölkələrdə bütün ölümlərin yarısından azını təşkil edib ki, bu da ÜST-ün hesablamalarına görə, daha qlobal epidemioloji keçidi göstərir.
Tətbiqimizi yükləyə bilərsiniz
