ABŞ və İran rəsmiləri yeddi aydır davam edən müharibəyə son qoymaq üçün yenilənmiş səylər çərçivəsində bazar ertəsi vasitəçilərlə ayrı-ayrılıqda danışıqlar aparıblar.
Yeniavaz.com xəbər verir ki, bu barədə “Reuters”ə hər iki ölkənin rəsmiləri bildirib.
Bildirilib ki, danışıqların növbəti mərhələsinin İranın ötən həftə Birləşmiş Millətlər Təşkilatının Baş Assambleyasında təqdim etdiyi yeddi günlük təklifin dəyişdirilmiş variantı üzərində aparılacağı gözlənilir.
Qeyd edək ki, müharibə fevralın sonlarında ABŞ və İsrailin İrana hücumları ilə başlayıb. Yeddi ay ərzində minlərlə insan həlak olub, neft üçün həyati əhəmiyyət daşıyan su yollarının bağlanması isə qlobal bazarlarda ciddi sarsıntı yaradıb.
ABŞ və İran daha əvvəl vasitəçilik edilən sülh danışıqları zamanı iki dəfə – aprel və iyun aylarında – atəşkəs barədə razılığa gəliblər. Lakin bu razılaşmalar qısa müddət sonra pozulub.
BMT Baş Assambleyasının iclasında iştirak etdikdən sonra Nyu-Yorkda qalan İranın xarici işlər naziri Abbas Əraqçi bildirib ki, Tehran ABŞ-nin son atəşkəs təkliflərinə, eləcə də Hörmüz boğazında dəniz nəqliyyatının bərpası üçün irəli sürdüyü şərtlərə cavab verməsini gözləyir.
“Əgər amerikalılar razılaşma və ya sülh yolu ilə həll axtardıqlarını iddia edirlərsə, biz həmin həlli təqdim etmişik”, - Əraqçi deyib.
ABŞ Prezidenti Donald Tramp bazar ertəsi Ağ Evdə jurnalistlərə açıqlamasında bildirib ki, ABŞ rəsmiləri də ayrıca vasitəçilərlə danışıqlar aparıblar. O, bununla bağlı əlavə məlumat verməyib.
Tətbiqimizi yükləyə bilərsiniz
