İsrailin Baş nazir Benyamin Netanyahu nazirliklərarası qrupa və İsrailin Beynəlxalq Hüquq Departamentinin rəhbərinə Türkiyə Prezidenti Rəcəb Tayyib Ərdoğana qarşı Beynəlxalq Cinayət Məhkəməsi (BCM) üçün iddia hazırlamağı tapşırıb.
Yeniavaz.com xəbər verir ki, bu barədə “i24NEWS” telekanalı mənbələrə istinadla məlumat yayıb.
Telekanalın məlumatına görə, iddiada əsas kimi Ərdoğanın kürdlərə qarşı münasibəti, həmçinin HƏMAS-ı maliyyələşdirməsi göstərilir.
Telekanal bildirir ki, bu addımın atılmasında əsas səbəblərdən biri Ankaranın İsrail Baş nazirinə “qırmızı bildiriş” verilməsi ilə bağlı “İnterpol”a müraciət etməsi olub.
Məlumatda deyilir ki, İsrailin işi Beynəlxalq Cinayət Məhkəməsinin özünə göndərməsi ehtimalı var, lakin İsrailin işi başlatmaq üçün vasitəçinin xidmətlərindən istifadə etməsi daha çox ehtimal olunur.
“i24NEWS” əlavə edir ki, hər iki ölkə Roma Statutunu imzalamadığı üçün Beynəlxalq Cinayət Məhkəməsinin səlahiyyətlərini tanımır.
Qeyd edək ki, avqust ayında Türkiyə Ədliyyə Nazirliyi Netanyahunun “İnterpol” vasitəsilə beynəlxalq axtarışa verilməsini tələb edib. Buna səbəb İsrail ordusunun 2025-ci ilin payızında Qəzza zolağına humanitar yardım aparan donanmanı saxlaması olub. Türkiyə prokurorları İsrailin Baş naziri və digər təqsirləndirilən şəxslər üçün ömürlük həbs cəzası və əlavə 4596 ilə qədər həbs cəzası tələb edib.
Tətbiqimizi yükləyə bilərsiniz
