“Türkiyə Yunanıstanın düşməni deyil, qonşusudur” – Ərdoğan

Türkiyə-Yunanıstan münasibətləri seçki materialı kimi istifadə edilməyəcək qədər həssas və mühümdür.
Yeniavaz.com xəbər verir ki, bu barədə Türkiyə Prezidenti Rəcəb Tayyib Ərdoğan Birləşmiş Millətlər Təşkilatının (BMT) 81-ci Baş Assambleyası çərçivəsində Nyu-Yorkdakı Türk Evində jurnalistlərə bildirib.
“Yunanıstanın və ya digər qonşularımızın daxili siyasətinə qarışmaq niyyətimiz yoxdur. Yunanıstanda seçkilər keçirilir, hökumət dəyişir, müxalifət dəyişir - bu, bizim işimiz deyil. Bizim işimiz Türkiyənin hüquqları, təhlükəsizliyi, Egey və Şərqi Aralıq dənizində sülh və əmin-amanlığın qorunmasıdır. Bir daha çox aydın şəkildə bildirmək istəyirəm: Türkiyə Yunanıstanın düşməni deyil; o, onun qonşusu və NATO-nun himayəsi altında müttəfiqdir.
İki ölkə arasındakı münasibətlər o qədər həssas və vacibdir ki, seçki materialı kimi istifadə edilə bilməz. Biz bu müzakirələrə məhz bu prizmadan baxırıq”, - o qeyd edib.