Rusiya noyabr ayında keçiriləcək ABŞ Konqres seçkiləri ərəfəsində ölkədə siyasi fikir ayrılıqlarını dərinləşdirmək və seçkilərə olan etimadı sarsıtmaq məqsədilə gizli onlayn dezinformasiya kampaniyası aparır.
Yeniavaz.com xəbər verir ki, bu barədə “The New York Times” (NYT) qəzetinə ABŞ kəşfiyyatının qiymətləndirmələri ilə tanış olan rəsmilər məlumat veriblər.
Rəsmilərin sözlərinə görə, Kremlin Amerika auditoriyasına təsir göstərmək məqsədilə yeni əməliyyata icazə verdiyi müəyyən edilib. Kampaniya çərçivəsində sosial mediada siyasi gərginliyi artıran və seçki prosesi ətrafında çaşqınlıq yarada biləcək məzmunlar yayılır.
Son həftələrdə süni intellektdən istifadə olunmaqla hazırlanmış saxta videolar da aşkarlanıb. Bu videolarda məşhur Hollivud aktyorlarının və digər tanınmış şəxslərin Senat seçkiləri ilə bağlı fikirlər səsləndirdiyi görüntüsü yaradılıb.
Bununla belə, ABŞ kəşfiyyatının qiymətləndirmələrində Rusiyanın seçki infrastrukturuna birbaşa müdaxilə etməyə və ya səslərin hesablanması prosesinə təsir göstərməyə çalışdığına dair əlamətlərin olmadığı bildirilir.
Bəzi ABŞ rəsmiləri hazırkı kampaniyanın Rusiyanın əvvəlki əməliyyatları ilə müqayisədə daha məhdudmiqyaslı olduğunu düşünürlər. Onların fikrincə, əsas məqsəd konkret siyasi partiyanı dəstəkləməkdən çox, ABŞ-də siyasi qütbləşməni və xaosu artırmaq ola bilər.
ABŞ kəşfiyyat orqanları Rusiyadan başqa, İran və Çinin də seçkilərə mümkün müdaxilə fəaliyyətlərini araşdırır.
Tətbiqimizi yükləyə bilərsiniz
