Trampın seçkilər ərəfəsindəki açıqlamaları müzakirələrə səbəb olur

ABŞ Prezidenti Donald Tramp 2026-cı il aralıq Konqres seçkiləri ərəfəsində bir sıra açıqlamaları və qərarları ilə diqqət çəkib.
Yeniavaz.com CNN-ə istinadən xəbər verir ki, son 12 gün ərzində onun 5000 dollarlıq ödəniş vədi, Demokrat senatorların seçilməsi ilə bağlı açıqlamaları, ticarət siyasəti və media qurumlarına tətbiq etdiyi məhdudiyyətlər müzakirələrə səbəb olub.
Bir müddət əvvəl Tramp Respublikaçılar Partiyası Konqresin hər iki palatasında çoxluğu qoruyub saxlayarsa, hər bir yetkin amerikalıya 5000 dollar ödənilməsini təklif edib.
“Reuters”in hesablamalarına əsasən, belə bir proqramın ümumi dəyəri 1,2–1,35 trilyon dollar arasında ola bilər. Təklifin həyata keçirilməsi üçün Konqresin təsdiqi tələb olunur.
Tramp sentyabrın əvvəlində seçicilərin Demokrat senatora səs verməsi halında Şimali Karolinanın federal fəlakət yardımı ala bilməyəcəyini də bildirib. Prezident daha sonra bu açıqlamanı zarafat kimi təqdim edib.
ABŞ prezidentinin digər açıqlamalarından biri 11 sentyabr terror hücumları ilə bağlı olub. Tramp hücumlar günü Dünya Ticarət Mərkəzinin yaxınlığında olduğunu və binanın uçacağından qorxaraq yanğınsöndürənlərin onu təhlükəli ərazidən uzaqlaşdırdığını iddia edib.
Tramp həmçinin 2024-cü ildə Pensilvaniya ştatının Batler şəhərində ona qarşı törədilən sui-qəsd cəhdini Demokratlarla əlaqələndirib. O, hadisənin seçki kampaniyasından kənarlaşdırılmasına yönəlmiş “Demokratik plan” olduğunu iddia edib. Lakin Demokratların sui-qəsd cəhdində iştirak etdiyini göstərən ictimai sübut yoxdur. FTB direktoru Keş Patel daha əvvəl istintaq zamanı atıcı Tomas Kruksun valideynlərindən başqa şəxslərlə əlaqəsinə dair dəlil aşkarlanmadığını bildirib.
Tramp ticarət siyasəti ilə bağlı da sərt mövqe nümayiş etdirib. O, Federal Ehtiyat Sistemi faiz dərəcələrini aşağı salmadığı halda, ABŞ-nin ticarət kəsiri yaşadığı bütün ölkələrlə ticarətin dayandırılmasına hazır olduğunu deyib.
Sentyabrın 18-də isə Tramp CNN, “Politico” və “MS NOW”un Ağ Evə girişini məhdudlaşdırmaq qərarını açıqlayıb. Prezident bu media qurumlarını onun fəaliyyətini mənfi işıqlandırmaqda günahlandırıb. Ağ Ev rəsmilərinin qərardan təəccübləndiyi bildirilib. Bununla belə, açıqlamadan sonrakı ilk saatlarda CNN jurnalistləri binada işləməyə davam edib.
CNN-in məlumatına görə, Tramp daha əvvəl özünün Ali Məhkəməyə namizəd göstərdiyi bəzi hakimlərdən narazılığını da ifadə edib. O, İrlandiyanın mümkün birləşməsini dəstəklədiyini bildirib və süni intellektin təhlükəsizliyi ilə bağlı narahatlıqları “saxtakarlıq” adlandırıb.
Con Kennedi Milli Mədəniyyət Mərkəzi ətrafında da münaqişə yaranıb. Tramp qurumun adına öz adının əlavə edilməsini istəyir və əks halda mərkəzin ciddi nəticələrlə üzləşə biləcəyini iddia edir.
“Reuters/Ipsos” tərəfindən sentyabrın 11–14-də keçirilən sorğuya əsasən, amerikalıların 63 faizi Trampın Respublikaçılar Konqresdə nəzarəti saxlayacağı təqdirdə 5000 dollar ödəmək təklifini dəstəkləmir.