İranla müharibə ABŞ-yə neçəyə başa gəlib?

ABŞ-nin İranla müharibəsi artıq Müdafiə Nazirliyinə təxminən 38 milyard dollara başa gəlib.
Yeniavaz.com xəbər verir ki, bu barədə məlumat ABŞ Konqresinin Büdcə İdarəsinin (CBO) açıqladığı hesabatda öz əksini tapıb.  
Hesabatda həmçinin, müharibənin davam edən hərbi əməliyyatların intensivliyindən asılı olaraq ayda 2 milyard dollardan 3 milyard dollara qədər başa gələcəyi bildirilib.
CBO Pentaqonun xərclərini 1 avqust tarixinə - İrana qarşı hərbi əməliyyatların başlamasından təxminən beş ay sonraya qədər qiymətləndirib.
Bu məbləğə döyüşdə istifadə olunmuş və itirilmiş sursat və avadanlıqların dəyişdirilməsi, uçuşların sayının artırılması, digər hərbi əməliyyatlar və artan yanacaq xərcləri daxildir.
Lakin qiymətləndirməyə münaqişədə iştirak edən hərbi qüvvələrin saxlanması üçün əsas xərclər daxil deyil və bunlar artıq federal büdcəyə daxil edilir.
CBO-nun hesablamalarına görə, döyüşlərin intensivliyi may və iyun aylarında müşahidə olunan səviyyədə qalarsa, əlavə xərclər ayda təxminən 2 milyard dollar təşkil edəcək. Münaqişə iyul ayı ilə müqayisə edilə bilən intensivlikdə davam edərsə, aylıq xərclər təxminən 3 milyard dollara qədər artacaq. Döyüşlər şiddətlənməyə davam edərsə, bu xərclər daha da yüksək ola bilər.
Konqres Büdcə İdarəsi qeyd edir ki, onun qiymətləndirməsi əhəmiyyətli dərəcədə qeyri-müəyyənliyə məruz qalır: Pentaqon CBO-nun zəruri məlumatlar üçün sorğularına cavab vermədiyi üçün analitiklər hökumət məlumat bazalarından və açıq mənbələrdən istifadə edirlər.
CBO ABŞ ordusu üçün müharibənin ən ciddi nəticələrindən biri kimi raket ehtiyatlarının azalmasını göstərir. Onların bui şəkildə istifadə olunması ehtiyatın bir neçə il tükənməsinə səbəb ola bilər ki, bu da çox sayda ballistik və qanadlı raketlərə sahib olan düşmənlə yeni münaqişə zamanı problemlər yarada bilər.
Nümunə olaraq, CBO Tayvanla bağlı potensial münaqişədə raket arsenalının əhəmiyyətli rol oynaya biləcəyi Çini göstərir.
Münaqişə həmçinin enerji qiymətlərinin artması fonunda ABŞ iqtisadiyyatına da təsir göstərir. Hörmüz boğazından neft və qaz tədarükünün azalması və Qırmızı dənizdə gəmiçilikdə yaranan fasilələr qlobal enerji qiymətlərinin daha yüksək olmasına səbəb olur.
Mərkəzi Bank 2027-ci ilin birinci rübündə ABŞ-də inflyasiyanın fevral ayı proqnozundan 0,5 faiz yüksək olacağını gözləyir. Lakin CBO diplomatik əməliyyatlar və xarici yardımla bağlı bəzi potensial əlavə xərcləri qiymətləndirə bilməyib və bunun miqyası münaqişənin necə inkişaf edəcəyindən asılı olacaq.