ABŞ ilk dəfə kosmosda silah yerləşdirdiyini etiraf etdi

ABŞ ilk dəfə olaraq kosmosda döyüş əməliyyatları aparmaq üçün orbitə silah yerləşdirdiyini açıq şəkildə etiraf edib.
Yeniavaz.com xəbər verir ki, bu barədə “The Guardian” qəzeti məlumat yayıb.
Məlumata görə, ABŞ hakimiyyəti onun növünü və ya xüsusiyyətlərini açıqlamayıb, lakin ekspertlər xəbərdarlıq edirlər ki, Vaşinqtonun açıqlaması ABŞ, Rusiya və Çin arasında kosmosda təhlükəli silahlanma yarışını sürətləndirə bilər.
ABŞ Hərbi Hava Qüvvələri naziri Troy Meynk bazar ertəsi illik Hava, Kosmos, Kiber konfransında bildirib ki, ABŞ-nin artıq orbitdə ”kosmosa nəzarət etmək” üçün silahları var.
“Bu gün biz harada yaranmasından asılı olmayaraq, yaranan təhlükələrə qarşı hazırlığımızı təmin etməyə davam edirik. Buna görə də, ABŞ-nin orbitdə kosmosa nəzrət etmək üçün silahları var”, - deyə Meynk bildirib.
Ancaq nazir bu sistemlər haqqında təfərrüatları açıqlamaqdan imtina edib. ABŞ Kosmik Qüvvələrinin rəsmi nümayəndəsi isə izah edib ki, kosmik nəzarət həm kinetik (yəni hədəfə birbaşa zərbə endirənlər), həm də qeyri-kinetik (düşmənin imkanlarına təsir göstərənlər) vasitələri əhatə edə bilər. O əlavə edib ki, bu cür sistemlər həm hücum, həm də müdafiə missiyaları üçün istifadə edilə bilər.
Qeyd edək ki, ABŞ, Rusiya və Çin tərəfindən kosmik silahların hazırlanması heç kimə sirr deyil. Buraya, xüsusən də peyklərin işinə mane ola biləcək elektron əks-tədbir sistemləri, eləcə də daha güclü kinetik silahlar daxil ola bilər.
Uzun illərdir kosmik uçuşları araşdıran astronom Conatan Makdauell “The Guardian” qəzetinə verdiyi açıqlamada ABŞ-nin ən çox istifadə etdiyi silahın elektron maneə sistemləri olduğunu bildirib. O əlavə edib ki, Vaşinqtonun bunu ictimaiyyətə açıqladıqdan sonra Rusiya və Çin də eyni şəkildə cavab verəcəklər.
Kosmik təhlükəsizlik üzrə ekspert Viktoriya Samson da ABŞ-nin açıqlamasını əhəmiyyətli bir addım adlandıraraq qeyd edib ki, Vaşinqton indi oxşar sistemlərin Çin və Rusiyada da peyda olma ehtimalını nəzərdən keçirməli olacaq.
Xatırladaq ki, kosmosdan hərbi məqsədlər üçün istifadə 20-ci əsrin ortalarında başlayıb, lakin 1967-ci il Kosmos Müqaviləsi kütləvi qırğın silahlarının orbitdə yerləşdirilməsini qadağan edib. Lakin sənəddə kosmosda adi silahların yerləşdirilməsinə ümumi qadağa yoxdur.
Mütəxəssislərin təşvişləri birbaşa münaqişə potensialından kənara çıxır. Belə ki, peyklərin məhv edilməsi yüksək sürətlə orbitə çıxacaq və digər kosmik gəmilər üçün təhlükə yaradacaq çoxlu miqdarda tullantı yarada bilər.
Makdauell hesab edir ki, ABŞ əvvəlki kosmos ideyasından tədricən tamamilə dinc bir məkan kimi imtina edir və orbitdə silahlı münaqişə ehtimalını getdikcə normal bir ssenari kimi nəzərdən keçirir.